Pieter du Plessis van SA for Hope, wat die naweek skenkings aan 50 boere en plaaswerkers by Kleynshoogte oorhandig het, sê dat goeie neerslae steeds die Klein-Karoo ontwyk. Dit veroorsaak dat grondwater in dié gebied so te sê heeltemal uitgeput is.
Die 53 mm reën wat begin Maart geval het, het plaasdamme aangevul, maar nie ondergrondse watervlakke genoeg aangevul dat boorgate meer water kan lewer nie.
Die organisasie is daarom dankbaar vir besighede van oor die Tuinroete, ander gedeeltes van die Kaap en KwaZulu-Natal wat hul harte en hande oopgemaak het. Te danke aan hul skenkings kon SA for Hope op Saterdag 25 Maart kruideniersware, vars groente, gebottelde water, voer, asook honde- en katkos na Kleynshoogte neem.
“Hierdie mense ry op hulle eie koste en samel skenkings in of koop aan om hierdie gemeenskap van hulp te wees. SA for Hope is totaal afhanklik van die publiek en besighede se skenkings. Ons het nie woorde om dankie te se aan elkeen wat betrokke is nie. Met elke uitreik staan ’n mens verbaas as die voertuie intrek met hul vragte.
“Daar gaan so baie voorbereiding, organisering en reëlings in om alles in te samel, kospakkies op te maak, voertuie te reël en die finale logistieke reëlings te tref. Dan kom die dag van die uitreik en ons voertuie trek een vir een in . . . Wat ’n absolute voorreg om dit te kan sien en ervaar, dat daar soveel mense is wat nog omgee en hoop bring. Dit hou ’n mens plat op die aarde en nederig.”
Du Plessis vertel die organisasie was met dié uitreik bevoorreg om leerders van Laerskool George-Suid ook saam te neem. “Om die omgee en liefde by sulke jong mense te sien is ’n riem onder die hart.”
Ná so ’n uitreik is SA for Hope se bankrekening getap en moet daar weer van voor af met insamelings begin word. “Ons kry geen staatshulp of ondersteuning van enige ander organisasies nie. Alles wat gebeur, kom van ons lede, die publiek en besighede af. Brandstofpryse, elektrisiteit en kospryse skiet die hoogte in. Beurtkrag kniehalter besighede. Daar is ’n taai ekonomiese klimaat in ons land, maar steeds steek ons lede hul hande op en raak betrokke.
“Dit is mos nou ’n voorbeeld wat ons wil oordra in Suid Afrika. Maak nie saak wat nie, ons sal nie ons boere, hul werkers en die gemeenskappe aan hul eie lot oor laat nie. Raak betrokke, ’n blikkie kos kan ’n verskil maak, ’n sakkie hondekos, ’n sak voer, ’n bottel water . . . Selfs net jou glimlag en teenwoordigheid op so uitreik maak ’n verskil. Raak betrokke by SA for Hope en wees die verskil.”
Besoek SA for Hope se Facebookblad vir nog inligting.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
