Hoewel dit nog vroeg in die seisoen is, verwag die SA Tafeldruifvereniging ‘n normale oes vanjaar.
Mnr. Johan van Niekerk, voorsitter, sê die oes is sowat ‘n week later as verlede jaar en vroeë tekens dui op normale produksie.
Volgens Van Niekerk het die meeste wingerde normaal gebot en is die trostelling normaal. Hy sê die produsente wag nog op reën en moontlik hael, maar hulle is versigtig optimisties. “Die oes is ‘n week later as verlede jaar, maar 2010 se oes was ‘n week vroeg. Die tekens is nie daar vir hoër as gemiddelde produksie nie, maar wel vir normale produksie.”
Oranjerivier
Produsente langs die Oranjerivier verwag glo ook ‘n redelike normale oes ten spyte van die oorstromings wat dié Benede-Oranjerivier vroeër die jaar behoorlik moedeloos gehad het.
Van Niekerk sê die meeste tafeldruiwe word nie direk langs die rivier geplant nie, dit is die beste plek om rosyntjiedruiwe te plant. “Ons dink ons gaan ‘n doodnormale oes hê.”
Uitvoere groei
Volgens Van Niekerk kan die bedryf duidelike groei in sy uitvoermark na die Ooste, spesifiek die verre Ooste, sien. “In 2005 is 5% van die oes na die verre Ooste, Asië, uitgevoer. Dít het van 2009 na 2010 van sowat 15% na 18% gegroei. Die totale uitvoer na die twee streke is sowat 30% van die oes.”
Die groei vind ten koste van Europa plaas. Sowat 65% van Suid-Afrika se tafeldruiwe word jaarliks na Europa en Brittanje uitgevoer, sê Van Niekerk.
12 Oktober 2011
