In teenstelling met die Gautengse departement van landbou en landelike ontwikkeling se boodskap dat grondeise in dié provinsie afgehandel is, meen Agri SA baie eise is steeds uitstaande.
Me. Nandi Mayathula-Lehoza, LUR vir die departement, het luidens ‘n berig op News24.com gesê 99% van die grondeise in Gauteng is reeds afgehandel. Volgens haar moet slegs twee eise, dié van die plaas Krokodilspruit en die Suikerbos-natuurreservaat, afgehandel word.
Dr. Theo de Jager, ondervoorsitter van Agri SA, sê ‘n groot hoeveelheid van die provinsie se grondeise word deur Limpopo en Noordwes se grondeisekommissarisse hanteer en is nog nie afgehandel nie. “Die provinsie het aanvanklik nie sy eie grondeisekommissaris gehad nie.”
Lae prioriteit
De Jager meen baie van die grondeise wat op dié wyse hanteer word, geniet nie voorkeur by die provinsiale departement nie, en ook nie by die Gautengse departement nie. “Daar is totale wanorde in verband met die eise-administrasie.”
Volgens hom is die groot hoeveelheid eise op hoewes langs die Moloto-pad, ‘n goeie voorbeeld daarvan. “Dié eise is al byna sewe jaar gelede in Limpopo in die Staatskoerant gepubliseer, maar dit is steeds nie afgehandel nie en word tans deur die grondeisekommissaris in Nelspruit hanteer.”
Die pryse van die aanvanklike duur grond, wat hoogs ontwikkel was met byvoorbeeld wingerde, het intussen heelwat gesak en produktiwiteit het gedaal.
De Jager sê dié sloerdery skep ‘n plofbare situasie onder grondeienaars wat nie betaal word nie en begunstigdes wat vir hulle grond wag. “Dit raak ook die welvaart van landbou-ondernemings en werksgeleenthede vir veral plaaswerkers,” sê hy.
Bron: News24.com
3 September 2010
