Sowat 500 renosters kan weens die stropery uit die Kruger-wildtuin na "veiliger bestemmings" verskuif word.
Volksblad berig me. Edna Molewa, Minister van Omgewingsake, het gesê die bestemmings sal natuurreservate binne Suid-Afrika, maar ook buurlande soos Botswana en Zambië, insluit.
Altesame 631 renosters is sedert die begin van die jaar gestroop. Hiervan is 408 in die wildtuin gestroop.
Molewa het ook die uitslag van 'n sensus bekend gemaak wat onlangs in die Kruger-wildtuin gehou is om vas te stel of die stropery enige negatiewe uitwerking op renostergetalle het. Dit blyk dat die aantal renosters wat doodgaan weens stropery en natuurlike oorsake byna gelyk aan die geboortes is.
Die verskuiwing van die renosters uit die wildtuin sal waarskynlik nie vanjaar plaasvind nie, omdat sulke programme gewoonlik in die droë, winterseisoen gedoen word.
Bron: Volksblad.
