“Suid-Afrika gaan voortaan nie meer ’n navolger wees op die gebied van genetiese verbetering nie, maar ’n leier.”
Dit is die onderneming van dr. Anton Smit, uitvoerende hoof van Taurus Evolution. Hy het op die bekendstelling van dié nuwe lewendehawe-genetikamaatskappy in Bloemfontein gesê die betrokkenheid van die Franse maatskappy Evolution by Taurus beteken nie net ’n reddingsboei vir die voormalige plaaslike veeverbeteringskoöpersaie nie, maar dat sy dienste ook na Afrika uitgebrei sal kan word.
“Die ou Taurus is in die proses omgeskakel in ’n private maatskappy waarin Evolution ’n aandeel besit om die bestuur daarvan te vergemaklik,” sê hy. Suid-Afrikaanse boere sal steeds betrokke wees en aandele besit.
Smit wou nie uitbrei oor die omvang van die geldelike inspuiting nie, maar sê Taurus Evolution sal voortaan toegang hê tot die jongste tegnologie en genetiese ontwikkeling uit Europa.
As een van die praktiese uitvloeisels van die samesmelting, het hy aangekondig dat ’n bul-toetsstasie in samewerking met Ramsem op ’n aangrensende perseel in Bloemfontein-Oos ontwikkel gaan word.
Die bekendstelling is glansryk gevier en is onder andere bygewoon deur me. Elizabeth Barbier, die Franse ambassadeur in Suid-Afrika,’n Franse handelsafvaardiging en die bestuur van Evolution in Frankryk.
