Sonder dié tariewe teen dié lande (Brasilië, Spanje, Denemarke, Pole en Ierland) sal die storting en invoer van pluimveeprodukte net toeneem, terwyl ’n besluit daaroor aanhou sloer, sê mnr. Izaak Breitenbach, hoof van Suid-Afrikaanse Pluimveevereniging (Sapa) se braaihoenderorganisasie.
In Desember is tydelike teenstoringstariewe van 3-265% teen dié lande ingestel. Dit het vir blydskap onder plaaslike pluimveevervaardigers gesorg, maar ook teenkanting gekry vanaf die betrokke lande se vleisinvoerders.
Die tydelike tariewe het egter vir net ses maande tot 14 Junie gegeld en dit is nog nie hernu nie. Intussen oorweeg Suid-Afrika se kommissie vir internasionale handelsadministrasie (Itac) steeds of die teenstortingstariewe vir vyf jaar teen die vyf lande ingestel moet word.
Mnr. Ebrahim Patel, minister van handel en nywerheid, het wel vanaf 12 Junie 60 dae om te reageer op die Itac-verslag wat die gevolge van onbillike handelspraktyke op die plaaslike pluimveebedryf uitlig.
Mnr. Anthony Clark van Smalltalkdaily Research sê die toutrekkery en gevegte in die media oor die tariewe tussen die bedryf en die vleisinvoerders kan moontlik een van die redes wees waarom daar nog nie ’n besluit oor die voortsetting van die tariewe gemaak is nie.
Daar is volgens hom ook heelwat ander faktore wat Patel moontlik sal moet oorweeg, soos die nadelige koste weens beurtkrag op die pluimveebedryf, asook hoë brandstofpryse en ander stygende verspreidingskoste.
“Bekostigbaarheid vir die laer inkomstegroepe moet ook vir hom ‘n kwessie wees,” sê Clark.
Waarskuwing
Breitenbach waarsku egter sonder voorlopig of heeltydse tariewe in plek, is die plaaslike pluimveebedryf in gevaar en die ongunstige impak kan reeds gevoel word.
“Die pluimveebedryf het soos menige Suid-Afrikaners ook te doen met beurtkrag, toegang tot vars, skoon water, stygende koste van brandstof en voer, en ’n minder as wenslike wisselkoers. Ten spyte van hierdie probleme produseer die bedryf steeds die goedkoopste hoender wat die rand kan koop,” sê hy.
“In Ghana, Senegal en Kameroen is dit duidelik hoe storting 'n bedryf maklik kan vernietig. Sonder hierdie tariewe in plek kan die stelselmatige aftakeling van Suid-Afrika se pluimveebedryf volg. Dít sal weer tot groot werkverliese en ernstige ekonomiese inkrimping bydra. Storting bring boonop die land se voedselsekerheid in die gedrang.
Volgens hom ondergrawe storting van hoender ook die “pilare van die meesterplan vir die pluimveebedryf”.
“In hierdie moeilike produksie-omgewing bly onbillike handelspraktyke van Brasilië, Ierland, Spanje en Denemarke wat hul produk op Suid-Afrikaanse bodem stort, steeds die grootste bedreiging vir plaaslike pluimveebedryf en Suid-Afrikaanse verbruikers.”
Die uitbreek van voëlgriep in Europa keer wel in ’n mate invoer vanaf daardie streek. Daarom, volgens Clark, sal Brasilië en Amerika vir eers die invoer na Suid-Afrika oorheers.
