Mnr. Faizal Daniels, die hoof van personeel in die Departement van Landbou, Bosbou en Vissery, het bedank nadat hy omstrede uitlatings op Facebook gemaak het.
Daniels het uitlatings oor pres. Jacob Zuma, die ANC en ANC-LP’s gemaak, onder meer in verband met me. Lindiwe Mazibuko, DA-LP, se verkiesing tot die DA se parlementêre leier.
Daniels het onder meer Zuma en die ANC-LP’s as verstrooid en onordelik beskryf. In sy kommentaar oor Mazibuko se verkiesing tot parlementêre leier het hy dit duidelik gemaak dat die ANC nie weet hoe om die nuwe rol van Mazibuko te hanteer nie.
Mazibuko-kwessie
Mazibuko is die eerste swart en jongste parlementêre leier van die DA. Mazibuko word gesien as die DA se wapen om groot getalle stemme van jong swart mense vir die party te werf.
Daniels het geskryf dat dit vir die oudste bevrydingsbeweging op die vasteland een van die maklikste take moes gewees het om die Mazibuko-kwessie te hanteer, want sy is nog jonk.
“Maar die ANC in die Parlement is baie ver verwyderd van die koukus wat polities deur mense soos Max Sisulu en Toni Yengeni bestuur is. Deesdae voel elke dag soos ’n Sondag (met die hoofsweep wat op pad na een of ander bidsessie is) en die jonger LP’s wat maak asof die Parlement ’n sjebien is.”
Nuwe waarnemende hoof
Daniels wou nie kommentaar lewer oor waarom hy die uitlatings op die sosiale forum gemaak het nie. Hy het bevestig dat hy die ministerie verlaat het.
Mnr. Selby Bokaba, waarnemende hoof van personeel in die departement, het aan Landbouweekblad gesê dat Daniels Vrydag sy pos verlaat het.
“Hy het volle verantwoordelikheid vir sy uitlatings op Facebook aanvaar en aangebied om te bedank.” Minister Tina Joemat-Pettersson het die bedanking aanvaar.
Bokaba het ontken dat Daniels deur Joemat-Pettersson uitgeskop is.
7 November 2011
