Cosatu het op Menseregtedag (21 Maart) ’n verklaring uitgereik waarin ook beweer word dat plaaswerkers reg oor Suid-Afrika uitgebuit en mishandel word.
Bennie van Zyl, hoofbestuurder van TLU SA, sê die organisasie het besluit om ’n streep te trek teen ongegronde en benadelende stellings teen boere.
“Dit is asof Cosatu elke dan en wan besef hy het iets nodig om blootstelling te kry en politieke munt te slaan en dan besluit om opruiende stellings te maak oor iets wat hulle weet hulle ondersteuners gaan ondersteun, soos dat boere moordenaars, rassiste en verkragters is, sonder om te dink aan die werklike nagevolge wat dit vir boere inhou.
“Hierdie stelling is ’n gruwelike veralgemening wat in elk geval geen gronde bevat net om politieke munt te slaan ten koste van die goeie verhouding tussen boere en hul werkers. TLU SA se standpunt is deurentyd dat as daar enige oortreding van ’n wet is, die regsproses sy gang moet gaan. Daar waar ’n oortreding plaasvind, moet ’n saaknommer verskaf word as bewys.”
Van Zyl sê dit is totaal onaanvaarbaar dat enige instelling sulke veralgemenings sonder substansie maak. “TLU SA eis dat Cosatu onvoorwaardelik verskoning moet aanbied teenoor elke boer in die land en verder skadevergoeding van R5 miljoen betaal aan slagoffers van plaasaanvalle.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
