Arbeidsonrus by verskeie internasionale hawens, Suid-Afrika ingesluit, het in 2022 buitengewoon hoë druk op internasionale hawebedrywighede geplaas. Ongeveer 38 gevalle van arbeidsonrus is verlede jaar by verskeie hawens wêreldwyd aangemeld. Dié getal is vier keer meer as aangemelde gevalle in 2021 toe covid-19 ontwrigtings in internasionale handelsbedrywighede veroorsaak het.
Vakbonde, skeepsmaatskappye en kenners in seevaart het reeds begin waarsku werkers by hawens voel die impak van stygende brandstof- en voedselpryse in hul sakke sedert Rusland sy inval in Oekraïne begin het, maar lone word nie aangepas nie.
“Arbeidsonrus gaan waarskynlik nie in 2023 afneem nie, inteendeel, dit kan vererger indien die wêreldwye ekonomiese omstandighede versleg,” het ’n woordvoerder van Crisis24 aan Bloomberg gesê.
Crisis24, ’n sekuriteitskonsultasiemaatskappy bedrywig in seevaart, se inligting toon daar was slegs nege aangemelde gevalle van onrus en stakings by hawens van Julie 2020 tot die einde van daardie jaar.
Protesoptrede en stakings het by groot internasionale hawens in 2022 plaasgevind. In Suid-Korea het vragmotorbestuurders twee keer in ses maande vertragings veroorsaak by die vraghouerafdeling van die Busan-hawe.
Opeenhopings by Europese hawens het plaasgevind toe Duitse en Britse dokwerkers hul poste verlaat het. Van Haiti se hawens is lamgelê toe geweld tussen bendes uitgebreek het tydens hul pogings om beheer oor ’n belangrike olieterminus en hawe te verkry.
Suid-Afrika is ook nie gespaar nie. Transnet het in Oktober force majeure verklaar toe die staking by van sy hawens, onder meer Kaapstad, begin het. Die staking het onder meer die uitvoer van wyn, metale en vrugte vertraag.
Troebel tye kan stakings verhoog
Die vooruitsig van die voortsetting van ekonomiese onstabiliteit in die wêreld gedurende 2023 kan bydra tot selfs meer onstuimigheid wat die internasionale verskaffingskettings betref, word gewaarsku.
Inflasie kan wêreldwyd in 2023 aanhou om ’n bedreiging vir verskaffingskettings en die arbeidsmag te wees. “Arbeid kan dus ook ’n wispelturige part in die jaar se vooruitsig speel,” volgens die maatskappy.
