Toerusting van R105 000 is onlangs aan die Hoër Landbouskool Marlow naby Cradock geskenk, aldus Sybokhaar Suid-Afrika (SSA).
Die donasie is gemaak omdat dié skool een van twee in die land is wat kursusse aanbied wat spesifiek op Angorabokke en die sybokhaarbedryf fokus.
Luidens ’n verklaring ondersteun die organisasie die skool reeds 12 jaar lank. Tegniese beamptes van die SSA besoek die skool twee keer per jaar om leerders op te lei in die kuns van die sortering en klassering van sybokhaarskeersels.
Beginpunt
Mnr. Deon Saayman, die hoofbestuurder van die SSA, sê Marlow is die beginpunt van sybokhaarboere en ’n goeie leerskool vir makelaars en kommoditeitsorganisasies binne die sybokhaarbedryf.
“Dit is dus belangrik vir die toekoms en die sukses van die sybokhaarbedryf dat ons instansies soos Marlow en ander landbou-opleidingsentrums ondersteun, nié net deur toerusting te skenk nie, maar ook om tyd af te staan aan die opleiding en verbetering van leerders,” vertel Saayman.
Die onlangse donasie het toerusting soos elektriese skeermasjiene, sorterings- en klasseringstafels en sorteerhouers ingesluit.
5 September 2011
