Mnr. Bennie van Zyl,
hoofbestuurder van TLU SA, sê die nuus van 15 000 nuwe polisielede oor die volgende
drie jaar was een van die aspekte wat verskeie reaksies uitgelok het.
“Aan die een kant is dit beslis goeie nuus, want veiligheid is ’n reuseprobleem in Suid-Afrika en dit het ’n grootskaalse impak op die ekonomie. Dit is egter ook ’n werklikheid dat 15 000 polisielede oor drie jaar alleen nie die antwoord is nie en dat soveel meer nodig is om misdaad aan te pak. Ek sal graag wou sien dat meer spesialiseenhede tot stand kom.”
Mnr. Enoch Godongwana, minister van finansies, het ook tydens sy toespraak gesê dat die regering ’n groot deel van Eskom se skuld gaan oorneem, die spesiale covid-19-welsynstoelae van R350 tot Maart 2024 uitbetaal sal word en staatsamptenare gaan nie meer as ’n 3%-verhoging kry nie.
Van Zyl verwag dat die publiek se reaksie hierop uiteenlopend sal wees en moontlik optrede soos stakings tot gevolg kan hê.
“Daar is ’n gaping tussen aankondigings en uitvoering. Solank die regering volhard op sy pad van kaderontplooiing en SEB en nie kundigheid alleen as kriteria toepas in aanstellings nie, is die begroting nie noodwendig tot voordeel van Suid-Afrika se mense nie.
“Dis asof Godongwana sy hoop en wense uitgespreek het, maar van die werklikheid vergeet het. Dalk moes hy ook gegewe die geskiedenis van die resultate van kaderontplooiing en gepaardgaande korrupsie ook net sê wie gaan al hierdie dinge doen!”
Transnet het Godongwana se aankondiging dat ’n gedeelte van die begroting aan dié maatskappy toegewys is ten einde steun te bied vir die onverwagse en onvoorspelbare uitgawes wat weens April se vloede in KwaZulu-Natal aangegaan moes word, verwelkom. Luidens ’n verklaring deur Transnet sal die geld gebruik word om die spoornetwerk te herstel.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
