Onsekerheid oor die lewering van suikerriet aan die suikerreus is van die dringende kwelvrae waarmee baie suikerrietboere nou worstel.
“Tongaat Hulett se stap om vrywillig in sakeredding te gaan veroorsaak ’n chaos onder veral opkomende suikerrietboere,” het dr. Siyabonga Madlala, hoofbeampte van die Suid-Afrikaanse Boere-ontwikkelingsvereniging, aan Landbouweekblad gesê.
“Die besluit is hartseer en onrusbarend. Dit skep onsekerheid oor wat die toekoms inhou, oor toekomstige betalings en of boere nog hul suikerriet aan Tongaat Hulett sal kan lewer.
“Tongaat Hulett kan nie sommer net ineenstort nie. KwaZulu-Natal se ekonomie het dit nodig en selfs kommersiële boere is van die maatskappy afhanklik.”
Hy het gesê daar heers ook baie onsekerheid oor die lot van die maatskappy se 3 000 permanente werknemers, maar geen inligting oor die moontlikheid van werksverliese kan bekend gemaak word voordat alle belanghebbendes en die sakeredders, Metis Strategic Advisors, byeengekom het nie.
Tongaat Hulett het intussen laat blyk meer inligting oor hoe bedrywighede vorentoe daarna gaan uitsien, sal mettertyd bekend gemaak word. “Daar moet eers met die sakeredders vergader word en hulle sal besluit hoe op medianavrae gereageer kan word,” luidens ’n antwoord aan Landbouweekblad.
Tongaat Hulett lewer ná verwerking ongeveer 50% van Suid-Afrika se suiker.
Die beleërde maatskappy het verlede week aangekondig sakeredding is nou die pad vorentoe nadat skuldeisers nie tevrede was met voorgestelde herstruktureringsplanne vir die maatskappy se bykans R6,3 miljard se skuld nie.
Die JSE het reeds verhandeling in Tongaat Hulett-aandele tydelik opgeskort aangesien die maatskappy nog nie sy finansiële resultate kon uitreik nie.
Suikeraanplantings al hoe minder
Volgens die buro vir voedsel- en landboubeleid (BFAP) het die suikerprys wêreldwyd van Mei 2020 tot Mei 2022 met 88% gestyg vanweë die voortslepende droogte in Brasilië en hoër Brent-ruoliepryse.
BFAP verwag Suid-Afrikaners kan op ’n jaargrondslag 0,7% meer suiker gebruik, na gelang van wat met die gesondheidsbevorderingsheffing (suikertaks) oor die komende jare gebeur.
Ten spyte van die hoër internasionale suikerprys en verwagte stygende plaaslike verbruik van suiker word egter steeds verwag Suid-Afrika se aanplantings van suikerriet gaan oor die volgende twee jaar daal, grootliks weens die styging in die kunsmis- en chemiese insetkoste.
Volgens BFAP kan die skade aan infrastruktuur wat vroeër vanjaar tydens die vloede in KwaZulu-Natal aangerig is, ook bydra tot die verwagte afname.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
