Total Suid-Afrika, wat al meer as ’n halfeeu met Kaap Agri sake doen, is aangewys as dié agri-besigheid se top-verskaffer vir die jaar.
“Baie organisasies maak die fout om net na binne, na hulself, te kyk om dinge te verbeter, en vergeet dan van die kliënt. Ons geheim is ons luister na Kaap Agri, want hulle wéét hoe om kliënte gelukkig te hou,” sê mnr. Jason Abrams, kommersiële bestuurder van Total SA. Dié maatskappy is tydens ’n uithangfunksie op Hermon as beste verskaffer en ook as wenner in die energie-kategorie aangewys.
“Ek het altyd gesê voor ek doodgaan wil ek dié outjie wen,” het Abrams gesê toe hy die toekenning ontvang.
Wernemers by ál Kaap Agri se takke besluit jaarliks op grond van ’n vyftienpunt-kriteriastelsel wie hul beste verskaffers is. Die punte word dan gekonsolideer. Verskaffers word dus deur die hele Kaap Agri aangewys, en nie net deur bestuurslede nie. Vanjaar is ’n elektroniese stelsel vir die eerste keer gebruik. Mnr. Hennie Smit van Kaap Agri sê etiek, mededingendheid, verhouding, bemarking en impak is die vernaamste kriteria.
Volgens mnr. Sean Walsh, besturende direkteur van Kaap Agri, het die onderneming in 2012 altesaam R1,7 miljard se goedere by hul 30 beste verskaffers gekoop. Die afgelope finansiële jaar het dié syfer tot R2,5 miljard gestyg. “Ons verskaffers het dus groei van 50% of meer gesien.”
Uit die boonste 30 verskaffers, doen ses al sedert die ontstaan van hul ondernemings sake met Kaap Agri. Net dertien doen al 20 jaar of langer sake met Kaap Agri en slegs vier (New Holland, Total, Chevron en Virbac) is al 50 jaar by Kaap Agri betrokke.
“Die top-30 verskaffers neem meer as 33 000 mense in diens. Welvaartskepping is vir ons belangrik. Ons maatskappy het van 2010 tot 2014 35% meer mense in diens geneem, 98% mense verdien meer as die minimum loon en algemene werkers se verhogings is sowat 44% hoër as bestuur s’n, en tog het ons 114% meer belasting betaal en 100% meer wins gemaak,” het Walsh gesê.
Byskrif: Mnre. Alex van Breda van Total, Sean Walsh, besturende direkteur van Kaap Agri en Jason Abrams, kommersiële bestuurder van Total, met die toekenning wat Total as Kaap Agri se beste verskaffer van die jaar gewen het.
