Me. Ayanda Shezi, Transnet-woordvoerder, sê sedert Transnet sy aanvanklike aanbod ter tafel gelê het, het die maatskappy ten spyte van bedryfs- en finansiële kwessies vier pogings aangewend om dié aanbod te verbeter. Die verdere aanbiedings is ook gemaak omdat Transnet besef wat die impak van ’n staking op die werknemers, bedryf en ekonomie sou wees.
Volgens Shezi is die huidige staking onwettig aangesien die United National Transport Union (Untu) nie die regte prosesse gevolg het voordat met die staking begin is nie. Untu het die maatskappy glo op Maandag 3 Oktober van die beoogde staking in kennis gestel.
“Transnet se primêre doelwit is steeds om grootskaalse bedryfsaksie te vermy aangesien dit ’n aansienlike impak het op ekonomiese aktiwiteite reg oor alle sektore. Ons moedig werkers aan om die langtermyngevolge van die staking op hulself, hul kollegas, hul families en die Suid-Afrikaanse ekonomie as geheel in ag te neem.”
Sy sê Transnet glo die hersiende aanbod wat gister (5 Oktober) ter tafel gelê is, is redelik en regverdig en dat vakbonde dié aanbod ernstig moet oorweeg. Na gelang van werknemers se posvlak is ’n loonverhoging van 3% tot 4% aangebied, asook ’n eenmalige ex gratia-betaling van R5 000 (voor belasting) aan alle werknemers.
Shezi sê Transnet kan nie voorspel wat die uiteinde van die staking of die moontlike impak op bedrywighede by Suid-Afrika se hawens sal wees nie. Die maatskappy bly egter daartoe verbind om die hersiende aanbod met Untu en die SA Transport & Allied Workers’ Union (Satawu) te bespreek.
“In die geval van grootskaalse bedryfsaksie sal gebeurlikheidsplanne toegepas word en die maatskappy sal alles moontlik doen om die veiligheid van sy personeel en persele te beskerm. Die personeel is ook reeds in kennis gestel dat die beginsel van geen werk, geen betaling sal geld.”
7 800 vraghouers sitrus wag vir uitvoer
Mnr. Justin Chadwick, uitvoerende hoof van die SA Sitruskwekersvereniging (SKV), sê die uitvoer van sitrus vanaf die Wes- en Oos-Kaap kan deur die staking beïnvloed word. Hoewel die sitrusseisoen geëindig het, is daar volgens hom nog 7 800 vraghouers sitrus wat vanaf Durban-, Ngqura- en Kaapstadhawe uitgevoer moet word.
“Genadiglik word skeepsdienste by hawens tot dusver nie geraak nie en bly dit volkome in bedryf. Die SKV sal daagliks gebeurlikheidsplanne met Transnet en kwekers bespreek om die impak van die staking op die beweging van sitrus deur die hawens te verlig.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
