Luidens die verklaring is die Navis-stelsel vir besprekings en die verwerking van vrag by alle hawens weer aanlyn en sal die oorblywende IT-stelsels stelselmatig in werking gestel word. Sommige IT-funksies moet egter nog by die hawe in Gqeberha herstel word.
Daar word beoog om vandag die stapeldatum-registrasies af te handel, wat die aflaai van vraghouers in die Kaapstadhawe sal bespoedig. Die alaai van dringende vraghouers vir die landbousektor, motorbedryf en vinnig bewegende verbruikersgoedere sal by alle hawens voorkeur kry.
Die force majeure by haweterminale bly egter van krag en sal luidens die verklaring binne die volgende paar dae hersien word.
Luidens die verklaring is ’n platform geskep waarop kontak gemaak word met die bestuurshoofde en ander senior verteenwoordigers van maatskappye wat deur die stilstand by Transnet geraak is.
Volgens Gordhan is Transnet se kliënte, met wie daar daagliks vergader word, tevrede met die herstelproses en gebeurlikheidsplanne wat in werking gestel is. Die verskepingslyne het aangedui dat hulle nie Suid-Afrikaanse hawens sal verbysteek nie.
Luidens die verklaring dui voorlopige ondersoeke van die kuberaanval daarop dat Transnet en sy kliënte se data nie in gevaar gestel is nie.
BAIE STADIG MAAR SEKER OP DREEF
Me. Sonja Carstens, mediawoordvoerder van die United National Transport Union (Untu), sê hoewel die Navis-stelsel weer by alle hawens aanlyn is, is dit een van talle stelsels wat weer in werking gestel moet word. Die SAP-stelsel, wat vir alles anders gebruik word, is steeds nie aanlyn nie.
“Dit is beslis nie normaal nie. Daar is ’n agterstand van meer as 7 miljoen e-posse wat hanteer moet word net by die haweterminale. Bedrywighede by Transnet is báie stadig maar seker besig om weer op dreef te kom, maar net by die haweterminale.”
Carstens sê Gordhan probeer Transnet se beeld poets om skade aan die maatskappy se reputasie te voorkom en te keer dat skepe verby Suid-Afrikaanse hawens vaar. “Untu ontmoedig dit ook, want uiteraard tref dit die Suid-Afrikaanse ekonomie.”
