Untu is die
meerderheidsvakbond wat werknemers van Transnet verteenwoordig. Sedert 30
September het 24 992 Untu-lede, wat 53,9% van die maatskappy se werknemers
verteenwoordig, gestaak.
Luidens ’n verklaring sal die ooreenkoms geld vir alle werknemers van alle vakbonde wat deelgeneem het. Dit sal geldig wees vanaf 1 April 2022 tot 31 Maart 2025. Die ooreenkoms word van 1 Oktober af toegepas. Die kommissie vir versoening, bemiddeling en arbitrasie het die ooreenkoms bemiddel.
“Die maatskappy se onmiddellike prioriteit is om die agterstand wat binne die hawe- en spoorstelsel opgebou is, op te klaar. Dringende en tydsgevoelige vrag sal voorkeur kry saam met die toepassing van herstelplanne met die samewerking van die bedryf en kliënte,” lui ’n verklaring deur Transnet.
Die ooreenkoms sluit die volgende elemente in:
- Jaar 1: ’n Verhoging van 6% in basiese lone vir posvlakke H tot L, en jaarliks 6% vir koste vir maatskappy-pakkette vir posvlak G.
- Jaar 2: ’n Verhoging van 5,5% in basiese lone vir posvlakke H tot L, en jaarliks 5,5% vir koste vir maatskappy-pakkette vir posvlak G.
- Jaar 3: ’n Verhoging van 6% in basiese lone vir posvlakke H tot L, en jaarliks 6% vir koste vir maatskappy-pakkette vir posvlak G.
- ’n Verhoging in die siekefondsbydrae, in ooreenstemming met die verhoging in die basiese salarisse, vir die tydperk van die ooreenkoms. Die verhoging vir die siekefondsbydrae vir die 2022-’23-boekjaar sal van 1 Oktober 2022 af geld.
- ’n Verhoging in die behuisingstoelae vir die 2023-’24- en die 2024-’25-boekjaar.
Die terugbetaling vir die periode van 1 April tot 30 September 2022 sal in twee sarsies geskied – drie maande se terugbetalings sal op 15 November 2022 betaal word en nog drie maande s’n op 16 Januarie 2023.
Transnet het sy dank uitgespreek vir die bystand wat hy van alle belanghebbendes, insluitend die kommissie, die regering, kliënte en die wyer bedryf ontvang het gedurende die staking.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
