Die Arbeidswet is oortree deur die boer na wie die werkers wat verlede week in ’n treinongeluk betrokke was, vervoer is, sê die Departement van Arbeid.
’n Voorlopige ondersoek is glo onderneem, en volgens die ondersoek het die boer die Wet op Basiese Diensvoorwaardes oortree.
Luidens ’n berig op Nuus24.com het me. Mildred Oliphant, Minister van Arbeid, in ’n verklaring gesê die boer het nie rekords gehad van die werkers nie, en dit “vererger die probleem. Die afwesigheid van hierdie besonderhede is ’n oortreding van die Wet op Basiese Diensvoorwaardes. Die wet bepaal dat werkgewers besonderhede van hul werknemers moet hê, insluitend van hul naasbestaandes.”
Volgens die berig is 25 mense oorlede en verskeie beseer in die ongeluk waar die vragmotor by ’n spooroorgang naby Malelane voor ’n volgelaaide steenkooltrein ingery het.
Ontken
Oliphant sê volgens arbeidsinspekteurs ontken die boer dat hy die werkers in diens geneem het. “Volgens hom het ’n kontrakteur die werkers na hom gebring. Dit is duidelik ’n onverdedigbare posisie en ’n oortreding van die Arbeidswet, wat bepaal dat die werkgewer al die besonderhede moet hê van mense wat op sy perseel werk.”
Mnr. Hennie Laas, hoof uitvoerende beampte van Mpumalanga Landbou, het in ’n vroeëre onderhoud met Landbou.com gesê met die inligting tot sy beskikking weet hy nie op watter gronde die departement ’n ondersoek teen die boer wil doen nie.
Volgens Laas se inligting is die werkers deur ’n kontrakteur – glo die bestuurder van die vragmotor – na hom vervoer waar hulle werk gesoek het. Dié werkers was dus nie in sy diens nie en die vragmotor behoort ook nie aan hom nie.
Bron: Nuus24.com
