Die 800 trekkereenhede wat in Februarie verkoop is, is 26% hoër as die verkope van 633 eenhede wat verlede Februarie aangemeld is.
Dit is die hoogste verkoopsyfer vir Februarie die afgelope 30 jaar, sê mnr. Lane Reynolds, voorsitter van die SA Landboumasjinerie-assosiasie.
Volgens Reynolds is verkope tot dusver vanjaar byna 50% hoër as verkope in 2011 vir dieselfde tydperk.
Stroperverkope van 20 eenhede in Februarie is aansienlik laer as die 27 eenhede wat verlede Februarie verkoop is. Vir die jaar tot dusver is stroperverkope ongeveer 11% laer as verkope vir die ooreenstemmende tydperk verlede jaar.
Reynolds sê die mark is verstewig deur onlangse aflewering aan regeringstenderaars. Die mark is steeds baie mededingend.
Volgens vooruitskattings sal trekkerverkope in die 2012-kalenderjaar sowat 6 700 tot 7 200 eenhede wees, byna 10% laer as verkope in 2011.
6 Maart 2012
