Luidens ’n verklaring deur mnr. Robert Davel, uitvoerende hoof van Mpumalanga Landbou, het die eienaar van die plaas waarop die onwettige protesoptrede gemik was, ’n noodoproep om hulp na sy bure gestuur toe hy voel die lewe van sy bestuurder en werkers was in gevaar.
Beeld berig dat mense uit die gemeenskap dié grondeienaar al geruime tyd teister deur werk te eis. ’n Groep van omtrent 25 mans het na bewering Vrydag weer by die plaas opgedaag.
’n Skermutseling het gevolg waartydens verskeie boere ernstig beseer is. Een boer het ’n skedelbreuk opgedoen en moes reeds twee keer geopereer word. ’n Ander, mnr. Danie Malan, het ook ’n ernstige kopwond opgedoen.
Malan is saam met drie ander boere in hegtenis geneem op klagte van moord en aanranding met die doel om ernstig te beseer.
Een van die protesgangers het Malan na bewering met ’n knopkierie oor die kop geslaan. Boere het sy aanvaller in hegtenis geneem terwyl hulle op die polisie en ’n ambulans vir Malan gewag het.
Kort voor die polisie op die toneel opgedaag het, is twee broers, mnre. Amos en Zenzele Choka, wat deel was van die protesgangers, doodgeskiet.
WILDE SKIETERY
Volgens Beeld het ooggetuies gesien hoe een van die Choka-broers ’n boer met ’n ysterstaaf oor die kop slaan en sy vuurwapen optel nadat die boer inmekaar gesak het. Hy het glo wild en wakker begin skiet. Hy het sy broer raakgeskiet voordat een van die boere die skieter uit noodweer geskiet het.
Die vier boere wat in hegtenis geneem is, moet op 19 April weer in die hof verskyn.
“Ons dra geen kennis van enige optoggangers wat aangekeer is vir die onwettige optog nie,” sê Davel. “Mpumalanga Landbou betreur die lewensverlies en die gepaardgaande ernstige beserings aan mense tydens die voorval. Ons ondersteun egter die beskerming van lewens en eiendom teen aggressiewe misdadigers.”
Mpumalanga Landbou het onderneem om die afwesigheid van ’n gespesialiseerde eenheid van die SA Polisiediens by so ’n plofbare situasie te ondersoek en het reeds, onder die vaandel van die forum vir landbou in Mpumalanga, ’n dringende vergadering met mnr. Mandla Msibi, die nuutaangestelde LUR vir landbou, landelike ontwikkeling, grondsake en omgewingsake, aangevra om die voorval te bespreek.
“Alle belanghebbendes moet alles in hul vermoë doen om die oorsake van konflik, wat lei tot sulke voorvalle, te voorkom. Ter wille van ’n vreedsame en stabiele omgewing, waarin boere en plaaswerkers kan voortgaan met hul belangrike taak om voedsel te produseer, word die publiek versoek om nie gevolgtrekkings te maak uit onbevestigde inligting en om nie onbevestigde nuus te versprei nie,” sê Davel.
