Die Sentrum vir Omgewingsregte het gister (6 April) die minister van Minerale Hulpbronne versoek om alle omgewingsregulasies vir myne in ooreenstemming te bring met omgewingsregulasies wat op ander nywerhede in Suid-Afrika van toepassing is.
Volgens me. Melissa Fourie, uitvoerende direkteur van die Sentrum vir Omgewingsregte in Kaapstad, het hulle ’n gedetailleerde voorlegging oor die hersiening en voorgestelde wysiging van die Wet op die Ontwikkeling van Minerale en Petroleumbronne namens 13 nie-regeringsorganisasies aan die minister gemaak.
Volgens Fourie het die departement van Minerale Hulpbronne, ten spyte van versoeke van omgewingsorganisasies, net die myn- en arbeidsektore geraadpleeg.
Verder kan die minderwaardige omgewingsbestuurstelsel vir die mynbedryf nie langer geregverdig word in ’n demokratiese samelewing nie, en veral nie in die lig van Suid-Afrika se internasionale en nasionale verbintenisse tot die beskerming van die omgewing en ’n “groen” ekonomie nie.
“Die gevolge van voortgesette spesiale behandeling vir myne is nie tot voordeel van die land, die mynbedryf, mynwerkers of myngemeenskappe nie. Dit is tyd dat die mynbedryf ook voldoen aan die reëls wat ander nywerhede geld.”
Fourie sê hul versoek is nie om myne te opponeer nie, maar eerder om te verseker dat voldoende impakstudies en die versagting van skadelike impakte plaasvind binne redelike tydperke vóórdat prospektering en mynbedrywighede begin.
Hulle wil ook seker maak dat dit opgevolg word met voorspelbare monitering van die vereistes en sterk wetsafdwinging waar gevind word dat daar nie aan die vereistes voldoen word nie.
“Dit is die enigste manier om te verseker dat verantwoordelike omgewingspraktyke by myne gevolg word.”
Die volledige voorlegging kan hier gelees word.
6 April 2011
