NewCo, die maatskappy wat die belange van die sakereus Tongaat Hulett wil oorneem, het die aankondiging verwelkom dat die Nywerheidsontwikkelingskorporasie (IDC) die werkskapitaal gaan voorsien om die huidige suikerseisoen te voltooi en noodsaaklike onderhoudswerk te doen. Mnr. Simon Cleasy, NewCo se woordvoerder, sê dit beteken dat kwekers minstens kan staatmaak op betalings vir hulle suikerriet in die huidige seisoen.
“Dit is noodsaaklik vir hulle boerderye se oorlewing op korttermyn en vir die duisende afhanklikes wat onderhou moet word. Daar is egter steeds groot onsekerheid oor die toekomstige voortbestaan van die meulens en ondernemings.” Tongaat Hulett is in vrywillige sakeredding nadat herstruktureringsplanne vir skuld van sowat R6,5 miljard misluk het. Die maatskappy (wat al 130 jaar lank bestaan) is een van die grootste werkverskaffers in KwaZulu-Natal.
NewCo is ’n ongenoteerde maatskappy wat namens suikerrietboere ’n reddingsplan aan Tongaat se sakeredders voorgelê het in ’n poging om werksgeleenthede in die streek te red. Kwekers lewer jaarliks meer as 5 miljoen ton suikerriet aan Tongaat Hulett se meulens in die provinsie. Volgens NewCo wil hy onder meer 11 000 kwekers en meer as 20 000 werksgeleenthede probeer red.
“Die sakeredders se sukses om befondsing by die IDC te bekom, is van die grootste belang maar nie genoeg om Tongaat Hulett en die mense wat vir hulle voortbestaan van die maatskappy afhanklik is, te red nie,” waarsku Cleasy.
“Meer as lenings, het Tongaat Hulett ’n plan nodig om winsgewendheid te herstel en die onderneming volhoubaar oor die langtermyn te maak. Die 2023-seisoen begin oor vier maande en boere het oordragvoorraad van meer as 500 000 ton suikerriet uit die huidige seisoen wat in die nuwe seisoen gepars sal moet word om vir noodsaaklike kontantvloei te sorg.
“Dit is noodsaaklik dat boere spoedig sal moet weet wat die planne is vir die volgende seisoen. Kwekers sal ook hulle operasionele planne vir toekomstige seisoene agtermekaar moet kry,” sê Cleasy. Hy sê ondanks die dringendheid van sekerheid, is daar nog geen aanduiding oor die sakeredders se planne nie en daar was nog geen reaksie op NewCo se voorstelle wat op 22 November ingedien is nie.
“Om Tongaat Hulett se toekoms te verseker, sal baie werk en aansienlike belegging verg. Dit is van deurslaggewende belang dat die sakeredders ander partye wat wil help moet betrek om by ’n uitvoerbare plan uit te kom. Hierdie onderhandelings is van die grootste belang vanweë die hoeveelheid mense wie se voortbestaan afhang van die suksesvolle reddingspoging van Tongaat Hulett.”
Die sakeredders het in ’n verklaring gesê die geld wat die IDV voorsien het is ’n “betekenisvolle stap vorentoe” in die sakereddingsproses aangesien die onderneming en ander rolspelers wat geraak word die vertroue kan hê dat die huidige seisoen voltooi sal word.
Daar is ook geld vir noodsaaklike onderhoudswerk, vir kaptale uitgawes en vir voorbereiding vir die nuwe seisoen. Die befondsing sal ook verseker dat hulle kan voortgaan om personeel, kwekers en ander verskaffers wat van Tongaat Hulett afhanklik is te betaal. Dit stel die sakeredders in staat om op ’n volgende fase van die sakereddingspoging te fokus.
