’n Span kundiges van die Departement van Landbou, Bosbou en Visserye, ondersoek tans die beweerde uitbreking van bek-en-klouseer in KwaZulu-Natal. Buffels uit Mosambiek wat die grens oorgesteek het, het moontlik die siekte na bokke en beeste versprei.
Die departement hou die situasie reeds sedert middel Februarie in bedwang. Die uitvoer van alle diere met gesplete hoewe en hul produkte is gevolglik opgeskort. Dit beteken dat die land tydelik sy status as vry van bek-en-klouseer verloor het.
Beheergebiede uitgewys
Produkte wat ten volle verwerk is, mag egter uitgevoer word. Die Ingwavuma-gebied, noord van die St. Lucia-vleilandpark en omstreke, die Mkuze-wildreservaat en die gebied oos van die Pongola-natuurreservaat is tot beheergebiede vir die siekte verklaar.
Dr. Botlhe Modisane, tegniese woordvoerder oor bek-en-klouseer by die Departement van Landbou, Bosbou en Visserye, het aan Landbouweekblad gesê positiewe serologiese toetsresultate is met roetine-waarneming opgemerk, maar geen kliniese simptome is sover gesien nie.
Helfte positief getoets
Van die sowat 600 diere wat getoets is, het 50% positief getoets. Verdere ondersoeke word nou deur kundiges gedoen. Hy het gesê die buffels het moontlik uit die Kruger-wildtuin na Mosambiek ontsnap en suidwaarts gemigreer.
Hy het die versekering gegee dat dit nog nie ’n klassieke uitbreking is nie en dat nog nie daaraan gedink word om diere te slag nie. Me. Tina Joemat-Pettersson, Minister van Landbou, Bosbou en Visserye, het benadruk dat die situasie onder beheer is. Al die nodige maatreëls is ingestel en boere hoef nie paniekbevange te wees nie.
Die Regering beoog om die opgeskorte uitvoersituasie binne drie maande om te keer. “Ons sal intensiewe ondersoeke doen. Nog voor ons handelsvennote ’n verbod op ons vleis kon plaas, het ons self ons uitvoer gestaak.” Sy het aangedui dat ondersoeke tot die noorde van KwaZulu-Natal beperk is omdat uitbrekings in ander gebiede nog nie waargeneem is nie.
1 Maart 2011
