Met die aanbreek van die vakansietydperk word reisigers en mense in landelike gebiede in veral KwaZulu-Natal, die Oos-Kaap, Limpopo, Mpumalanga en langs die grens tussen die Vrystaat en Lesotho gewaarsku oor die voorkoms van hondsdolheid.
Die departement van landbou, grondhervorming en landelike ontwikkeling sê die kusgebiede van KwaZulu-Natal en die Oos-Kaap is veral hoërisiko-gebiede en die publiek word afgeraai om enige rondloperdiere soos katte en honde op te tel of te hanteer. Die departement sê om rondloperdiere te hanteer of om vir hulle skuiling te bied, verhoog die risiko van die moontlike verspreiding van die lewensgevaarlike siekte na ander gebiede en provinsies.
Hondsdolheid is ’n baie ernstige, meestal dodelike siekte wat van diere na mense oorgedra kan word. Enige dier kan met hondsdolheid besmet word, maar die grootste gevaar wat dit vir mense inhou, is wanneer honde of katte besmet is. Die virus word oorgedra deur die speeksel van ’n besmette dier wanneer dit ’n mens byt, krap of lek.
In diere en mense tas die siekte die brein aan. As daar eers kliniese tekens van die siekte is, kan dit nie meer behandel word nie. As iemand dus vermoed dat hy in aanraking met ’n dier was wat moontlik hondsdolheid het, is dit van die grootste belang om die wond of plek van aanraking deeglik met seep en lopende water te was. Daar moet ook onmiddellik voorkomende mediese behandeling gesoek word.
Diere wat hondsdolheid het, kan veranderinge in gedragspatrone toon, maar dit verskil wyd en wissel van onverklaarbare aanvalle, tot diere wat baie mak en oorvriendelik voorkom, of dalk net slaperig lyk. Hulle kan oormatig kwyl, dalk sukkel om te sluk, aanhoudend blaf of tjank en dalk vreemde aggresiewe gedrag toon of selfs net swak voorkom.
Die departement moedig mense aan om rondloperdiere eerder by plaaslike dieresorganisasies aan te meld en sulke organisasies te ondersteun sodat hulle na die diere kan omsien. Die siekte kan enige plek in die land voorkom en daarom moet onbekende diere nie onnodig hanteer word nie.
Volgens die Wêreldgesondheidsorganisasie kom die siekte in meer as 150 lande voor en tienduisende mense sterf jaarliks veral in Afrika en Asië daaraan. In tot 99% van die menslike sterftes was dit honde wat die siekte oorgedra het, en in meer as 40% van gevalle waar mense die siekte opdoen, is dit kinders jonger as 15 wat besmette diere hanteer het.
