Huurpag is ’n sindroom van die tyd en die groenskrif oor grondhervorming is heuning om die mond, sê mnr. Steve Booysen. Booysen, voorsitter van AfriSake, sê dié dokument is ’n politieke stuk dokumentasie – “dis al wat dit is, en huurpag is die fundamentele grondslag vir die groenskrif.” Die voormalige hoof uitvoerende beampte van Absa was ’n spreker op ’n konferensie oor grondhervorming wat deur die Ad Hoc-komitee vir eiendomsreg aangebied is.
“Ek het groot kommer oor die groenskrif en die onderliggende effek wat dít en huurpag op die verval van ons waardesisteem kan hê,” aldus Booysen. “As ons dink ons het nou ’n probleem met korrupsie, gaan dit met die implementering van die huurpagstelsel net nog erger raak.”
Skaalekonomie
Booysen sê ’n sake-onderneming, soos ’n boerdery, moet skaalekonomie hê – ’n “groot besigheid” – om die winde van verandering te weerstaan.
Volgens Booysen, wat ook ’n direkteur van Clover is, is die daling in die aantal melkboere wat aan dié maatskappy lewer ’n teken daarvan. In 1999 het sowat 1 200 melkprodusente of verskaffers melk aan dié maatskappy gelewer, maar dié syfer staan tans op 265.
Kapitalisme
Verder sê Booysen kapitalisme is tans wêreldwyd onder druk en regerings se metodes om ekonomieë te herstel is om belasting te verhoog. Hy waarsku dat Suid-Afrika se belasting in die toekoms ook dié neiging kan begin volg.
Met dié saak in gedagte moedig Booysen ondernemings aan om die Regering hof toe te sleep oor swak dienslewering – soos swak paaie – wat ’n onderneming duur te staan kom. Dié aanbeveling is gebaseer op die feit dat hoë belasting reeds betaal word vir sogenaamde dienste.
Booysen moedig minderheidsgroepe in die land aan om aktief by prosesse betrokke te bly om seker te maak dat hul regte en belange nie op die kantlyn geskuif word nie.
31 Mei 2012
