Vee-eienaars in KwaZulu-Natal hoef nie te vrees dat hul vee van kant gemaak sal word weens die uitbreking van bek-en-klouseer nie, sê twee LUR’e. Luidens ’n berig op Buanews het me. Lydia Johnson, die LUR vir Landbou, Ekonomiese Sake en Landelike Ontwikkeling, en mnr. Mike Mabuyakhulu, die LUR vir Toerisme en Ekonomiese Ontwikkeling in KwaZulu-Natal, die naweek die omgewing besoek waar die uitbreking bevestig is en boere se vrese besweer.
Volgens die LUR’e is die maatreël dat diere van kant gemaak word om die verspreiding van die siekte te voorkom, nie ter sprake nie. “Hoewel die siekte self erg is, het dit nog nie wyd versprei nie. Dit is hoekom padblokkades 24 uur lank op strategiese roetes opgestel is om die verspreiding daarvan tot die geïdentifiseerde gebied te beperk”, sê Johnson.
Samewerking
Johnson het vee-eienaars aangemoedig om met die departement saam te werk deur hul vee na diptenks te neem waar hulle teen die siekte behandel en ingeënt kan word. “Alle ingeënte diere sal op hul nekke gebrandmerk word en enige dier wat ná die inentingveldtog nie ’n brandmerk het nie, moet gerapporteer word en die dier se eienaar moet ook geïdentifiseer word,” aldus Johnson.
Mabuyakhulu het op sy beurt gesê die vervoer van enige dier met gesplete hoewe oor distriks-, provinsiale en nasionale grense is tot verdere kennisgewing opgeskort. Hy het vee-eienaars se samewerking gevra om dié uitbreking te help bekamp.
“As vee-eienaars nie met die Regering saamwerk om dié siekte te beperk en uit te wis nie, sal uitvoerondernemings langer swaarkry en die verspreiding van die siekte sal daartoe lei dat alle beeste van kant gemaak word om die siekte uit te wis,” sê Mabuyakhulu.
Bron: Buanews
8 Maart 2011
