Kapt. Stephen Thakeng, polisiewoordvoerder, sê ’n boer het Dinsdag kort voor middernag die polisie in kennis gestel dat vier onbekende mans skape op sy plaas gesteel het. Twee beamptes het gereageer en ’n 33-jarige verdagte is in hegtenis geneem. Die drie ander verdagtes het van die toneel gevlug.
Tien skape ter waarde van R25 000 is aan die boer terugbesorg. ’n Saak van diefstal en die moontlike besit van gesteelde vee is aanhangig gemaak. Die verdagte sal vandag in die Hertzogville-landdroshof verskyn.
Die polisie kon wel op dieselfde dag daarin slaag om vyf vermeende veediewe by Vaalwater buite Modimolle in hegtenis te neem.
Brig. Motlafela Mojapelo, polisiewoordvoerder, sê die polisie kon danksy die gemeenskap en die Shambala Welgevonden-reaksie-eenheid vyf verdagte tussen die ouderdom van 39 en 60 vastrek.
Volgens hom het die polisie inligting ontvang oor ’n beoogde rooftog op ’n plaas. Verskeie polisie-eenhede is by ’n operasie betrek. Hulle kon dié rooftog fnuik nadat ’n voertuig wat gepas het by die beskrywing wat die polisie ontvang het, op die Melkrivier-pad opgemerk is.
Die voertuig met die vyf verdagtes daarin is voorgekeer. Twee vuurwapens en toerusting wat gebruik word om by huis in te breek, is in die voertuig gevind.
