Die veediefstal in sekere dele van Gauteng, wat boere al vir maande lank kopsere besorg, blyk aan die afneem te wees.
Mnr. Thinus Erasmus, voorsitter van die Gauteng Veediefstalforum, sê hy wil groot dank aan die Polisie betuig aangesien dit voorkom of veediefstal in die provinsie aan die afneem is. “Daar is beslis vordering en meer suksesse word aangemeld. Ek dink dit het definitief te doen met die aanstelling van nuwe polisiebeamptes by veediefstaleenhede,” verduidelik Erasmus.
Meer vee teruggevind
Volgens Erasmus is baie gunstige terugvoer van veral veediefstaleenhede in Vereniging en Cullinan gekry tydens ‘n onlangse vergadering. “Dit lyk of die gevalle aan die afneem is en hulle het meer suksesse met die terugvind van diere.”
Erasmus sê die beamptes doen die afgelope tyd ook moeite om by veilings te wees. “Dié tipe sigbaarheid speel ook ‘n groot rol.”
Slagplase
Die Polisie en die forum het glo ook onderneem om slagplase in die provinsie te teiken. “Ons nader hulle en moedig hulle aan om seker te maak hulle weet waar hul diere vandaan kom en of alles rondom die verkryging van die diere wettig is.”
Intussen sê kol. Oosie Oosthuizen, nasionale hoof van die veediefstaleenhede, hy is baie bly oor die vordering wat in Gauteng getoon word. “Ek het lanklaas ‘n oproep van die gemeenskap gekry wat ontevrede is.”
Wat die res van die land betref sê Oosthuizen “ons is maar besig op dié stadium”. Hy sê baie sake kom tans in. “Mens moet onthou soos werkloosheid toeneem soek mense enige ander vorme van inkomste om vir hulself te kan sorg.”
Hy moedig veeboere aan om deurgaans te sorg dat hulle sekurteitsmaatreëls opgeskerp is. Volgens Oosthuizen lê die veediefstalbrandpunte tans veral in die omgewings van Maluti, Harrismith, Amersfoort, Umtata en Uitrecht.
5 November 2010
