Veediefstal het in die afgelope boekjaar met 8,2% afgeneem, maar die polisie is nie tevrede met die situasie nie.
Mnr. Nathi Mthethwa, die Minister van Polisie, sê sedert 2008 was hulle erg bekommerd oor die styging in veediefstal.
Dit is as deel van die land se misdaadstatistiek Donderdag (8 September 2011) in Pretoria bekend gemaak.
“Terwyl ons bly is dat daar ’n daling van 8,2% in die aantal aangemelde veediefstalsake is gedurende die afgelope boekjaar, is ons steeds nie gelukkig met die situasie nie,” aldus Mthethwa.
Aanmelding
Hy sê die syfers is steeds te hoog en die polisie wil seker maak die daling is nie bloot omdat veediefstalle minder aangemeld word nie. Hy sê ná die bekendstelling van die Landelike Beveiligingstrategie vroeër vanjaar moet die veiligheidsdienste nou seker maak dat hulle plaaswerkers, kommersiële en kleinboere betrek by die beveiliging van landelike gebiede.
Mthethwa sê boere, plaaswerkers en plaasbewoners bly steeds maklike teikens vir misdadigers. Landelike polisiekantore is ook baie keer vir groot gebiede verantwoordelik, wat hul werk bemoeilik.
Moordsyfer daal
Intussen het die moordsyfer in die land met 6,5% gedaal. Tydens die 2010/’11 boekjaar is 15 940 moorde aangemeld. Mthethwa sê die statistiek wat oor moorde aangemeld word, is die mees betroubare syfer van misdaadstatistiek.
Hy sê hoewel die jongste misdaadstatistiek aandui dat misdaad aan ’t afneem is, is die syfers tans ’n aanmoediging om harder te werk om misdaad hok te slaan.
8 September 2011
