Die polisie op Ventersburg versoek die gemeenskap se hulp om veediewe, wat gisteroggend op die Christians Ruhe-plaas toegeslaan het, op te spoor.
Luidens ’n verklaring het die verdagtes rondom 02:00 in ’n Nissan NP200-bakkie op die plaas ’n paar kilometer buite Ventersburg aangekom en die drade geknip van die kamp waar die beeste aangehou is.
’n Bees ter waarde van R30 000 is sowat ’n kilometer van die kamp af met behulp van die bakkie se kopligte geslag. Toe die verdagtes die polisie sien aankom, het hulle weggehardloop en die bakkie op die toneel gelos. Omdat die plaas baie bosagtig is, kon die polisie hulle nie opspoor nie.
Die polisie het die bakkie, ’n hamer, twee tange, ’n bebloede mes, bebloede klere, koelerboks en bier gekonfiskeer om met die ondersoek te help en as bewyse in die hof te dien.
’n Saak van diefstal word deur die Odendaalsrus-veediefstaleenheid ondersoek.
Enigiemand met nuttige inligting word versoek om die ondersoekbeampte, adj.off. Beertjie de Beer, by 083 321 8241 of kapt. Francois Odendaal by 082 465 3159 te kontak.
