Taksverligting, onteiening met vergoeding van die Regering en ‘n veelvlak-grondprysstelsel is van die voorstelle waaraan die Departement van Grondhervorming en Landelike Ontwikkeling dink om die grondkwessie mee op te los.
Die Groenskrif, wat ‘n aanduiding sal gee wat die Regering se denke met die grondkwessie is, sal waarskynlik teen einde Oktober verskyn, waarna oor die voorstelle in die dokument gedebateer sal word en mense bydraes kan lewer.
Werksessie oor sektorplan
Me. Tina Joemat-Pettersson, Minister van Landbou, Visserye en Bosbou, het op die werksessie oor haar departement se sektorplan in Kaapstad, uitgelig dat die Departement vir Grondhervorming en Landelike Ontwikkeling in sy Groenskrif voorstel dat grond onteien moet word met vergoeding van die Regering.
Verder is ‘n veelvlak-grondprysstelsel nodig sodat die grond vir grondhervorming met belastingveligting gepaard gaan.
Die land moet ook ‘n grondwaardeerder-generaal kry, wat grond reg kan belas. In die Groenskrif word ook gepraat van agri-dorpies om plaasbewoners se behuisingsprobleme op te los.
Joemat-Pettersson het gesê dat landelike ontwikkeling en grondhervorming kerngeleenthede vir grondeienaarskap bied. Sy het belanghebbendes versoek om daadwerklik met oplossings vir die drie sektore te kom.
Ver-linkses tot die ver-regses
Sy het gesê dat verseker moet word dat oplossings vir “van die ver-linkses tot die verregses” gekry moet word. “As die ver-linkses sê ons moet nasionaliseer, moet ons in die werksessie evalueer wat dit vir die landbou-, visserye- en bosbousektor beteken.”
Sy het vroeër aangedui dat die debat oor die grondkwessie by die ANC se nasionale hoofraadsvergadering, wat Maandag begin, gevolg sal word.
Die departement sal ook sy bydra lewer tot die debat oor grondeienaarskap en -hervorming. “Ons sin is om grondhervorming te hê sonder dat voedselsekuriteit in gedrang gebring word,” het Joemat-Pettersson gesê.
16 September 2010
