As hulle egter hierdie verbod ignoreer en wel diere verhandel, kan hulle swaar gestraf word.
Mnr. Francois Knowles, uitvoerende hoof van die landbouprodukte-agenteraad (Apac), sê daar is gerugte dat sommige agente steeds handel dryf omdat beweer word dat me. Thoko Didiza, minister van landbou, grondhervorming en landelike ontwikkeling, haar magte oorskry het toe sy die verbod op veilings in die noorde ingestel het. “Hulle glo ook die verbod is ongeldig omdat die beheermaatreëls wat die minister aangekondig het, nie in die Staatskoerant afgekondig is nie. Hulle voer daarom aan dat hulle nie aan die verbod gehoor hoef te gee nie.”
In ’n gesamentlike verklaring van die departement van landbou en Apac word hierdie agente gewaarsku dat hul registrasiesertifikate gevries of gekanselleer kan word en dat hulle beboet kan word as hulle skuldig bevind word.
Minister is bemagtig
Die verklaring bevestig dat wanneer ’n aanmeldbare siekte uitbreek, die minister van landbou by magte is om spesiale maatreëls af te kondig om die verspreiding van en verliese weens hierdie siekte te beperk, asook om die siekte die hoof te bied. Die Wet op Dieresiektes (Wet 35 van 1984) skryf voor dat hierdie maatreëls deur die minster in ’n skrywe aan verantwoordelike persone in die betrokke omgewing gestuur moet word of dit moet in ’n koerant wat in die omgewing versprei word, gepubliseer word. Daarom is dit nie nodig om die maatreëls in die Staatskoerant af te kondig nie.
Knowles sê ingevolge die Wet op Landbouprodukte-agente (Wet 12 van 1992) moet agente voldoen aan die wette en voorskrifte wat op lewendehawe-agente van toepassing is. “Agente word dus aangemoedig om te voldoen aan die maatreëls wat die minister ingestel het. As hulle besware teen hierdie maatreëls het, moet hulle die minister nader om deur middel van ’n formele gesprek die uitwerking van die beheermaatreëls op die bedryf te bespreek. ’n Oortreding van die Wet op Dieresiektes is ’n strafbare oortreding. Mense wat die wet oortree, kan tronkstraf of ’n boete of albei opgelê word.
“Apac is bereid om agente by te staan as hulle met die owerhede oor die tydelike verbod op veilings wil gesels. Ons doen ’n beroep op agente om nie die wet in eie hande te neem deur strydig met die verbod wat die departement ingestel het, steeds diere te verhandel nie,” sê Knowles.
