Die veldtog teen die Onderstepoort-instituut vir Veeartsenykunde oor die kwessies met die toelating van studente kry al hoe meer momentum, sê AfriForum.
Luidens ’n verklaring het 20 voornemende studente reeds met die organisasie in verbinding getree, omdat hulle ondanks goeie akademiese prestasies, nie toelating gekry het om veeartsenykunde te studeer nie.
Volgens die organisasie het dié 20 studente altesame 155 onderskeidings in matriek behaal. Hulle is glo almal toelating geweier omdat hulle akademies nie goed gepresteer het nie.
AfriForum Jeug het derhalwe, namens die groep, die Universiteit van Pretoria (UP) versoek om redes te verskaf vir die weiering van toelating vir elkeen van die groep.
Minister
Die organisasie sê verder dat hulle verneem dat mnr. Blade Nzimande, Minister van Hoër Onderwys, ’n verduideliking van die universiteit versoek het. Dié stap volg glo op ’n brief wat die organisasie aan die minister gerig het om sy kommer oor die situasie en moontlike ongerymdhede aan hom bekend te maak.
Nóg ’n brief is aan prof. Cheryl de la Rey, die rektor van die UP, gestuur waarin die protes van die leerlinge teen die keuringsproses uiteengesit is. “Die brief nooi die rektor uit om saam met AfriForum Jeug ? wen-wen-oplossing te bereik,” aldus mnr. Charl Oberholzer, nasionale voorsitter van AfriForum Jeug.
Oberholzer sê in die brief stel hulle voor dat die universiteit saam met Nzimande oplossings moet soek om meer plekke vir top-studente te skep, óf om in die komende jaar meer voorsiening te maak vir eerstejaarstudente wat weer wil aansoek doen.
Veeartsgetalle
AfriForum sê die internasionale norm is dat ’n land 200 tot 400 veeartse vir elke miljoen mense moet hê. In Suid-Afrika is dié getal tussen 60 en 70 veeartse per miljoen. Volgens hom is 37% van die land se veeartsposte op nasionale en provinsiale vlak tans vakant.
“Die reaksie op navrae wat die Fakulteit Veeartsenykunde sover gegee het oor die redes waarom topleerlinge nie goed genoeg gepresteer het nie, is eenvoudig dubbelsinnig of oneerlik,” sê Oberholzer.
Landbou.com wag tans op antwoorde van die Universiteit oor die inligting in dié verklaring.
21 November 2011
