Volgens Adam Reilly, uitvoerende hoof van Maholla, toon sy maatskappy se verbruikersinligting ’n daling van 23,7% in die grootte van verbruikers se inkopiemandjies van Februarie 2022 tot Februarie 2023. Dié daling geld op ’n jaargrondslag en sluit die inligting oor die hele Suid-Afrika in.
“Die nuutste inligting wat ons op 27 Maart tot ons beskikking het, dui op ’n daling van meer as 20% in die grootte van die gemiddelde verbruiker se inkopiemandjie,” luidens ’n mediaverklaring.
Die inligting wat op die inkrimping van verbruikersbesteding dui, is verkry vanaf Maholla se beloningstelsel waarvolgens kliënte hul kwitansies inskandeer op ’n toepassing en só punte bymekaarmaak wat hulle kan gebruik.
“Die grootte van inkopiemandjies het in verskeie stede gedaal, maar die grootste dalings was in Oos-Londen, Bloemfontein en Soweto. Die jeug – mense onder 35 – se besteding het ook aansienlik gedaal en was beduidend minder as die kategorieë vir ouer persone.”
Die Noord-Kaap, Noordwes, KwaZulu-Natal, Wes-Kaap en Mpumalanga was die provinsies met die hoogste dalings in besteding waar verbruikers by Shoprite-, Pick ’n Pay- en Spar-winkels gekoop het.
Volgens Reilly dui die daling in die grootte van verbruikers se beursies op die gevolge van beurtkrag, stygende brandstofpryse en verbruikers wat toenemend onder druk verkeer. “Die brandstofprys gaan boonop vroeg in April styg en elektrisiteit word ook vanaf 1 April duurder wanneer Eskom se goedgekeurde 18,65%-styging in tariewe inskop.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
