Kapt. Dineo Sekgotodi, polisiewoordvoerder, sê me. Nonhlanhla Precious Thabethe (49) is op Donderdag 25 Augustus in hegtenis geneem. Die saak is tot 6 September uitgestel vir Thabetha se borgtogaansoek.
Volgens Sekgotodi is haar inhegtenisneming voorafgegaan deur die inhegtenisneming van haar medebeskuldigde, mnr. Edjuanida Teixeira (40), op Saterdag 14 Mei.
Teixeira is ook van mensehandel aangekla nadat die Valke se ondersoekspan vir georganiseerde misdaad op Secunda inligting ontvang het oor jong Mosambiekse burgers sonder die nodige dokumente wat op ’n plaas by Bethal aangehou word.
Met die span se aankoms op die plaas het hulle ses Mosambiekse burgers sonder die nodige dokumente aangetref wat aan die polisie gesê het hulle is uit Mosambiek gewerf met beloftes van werk in Suid-Afrika. Daar het egter niks van dié beloftes gekom nie.
Teixeira is in hegtenis geneem, maar Thabethe het toe ontsnap. Teixeira se saak is tot 20 September uitgestel vir verdere ondersoek.
