Die DA het die departement van landbou, grondhervorming en landelike ontwikkeling gevra om dr. Nkosazana Zuma, minister van samewerkende regering en tradisionele sake, te versoek om ’n ramptoestand in die Wes-, Noord- en Oos-Kaap, asook die Vrystaat te verklaar weens die uitbreking van sprinkaanswerms.
Mnr. Noko Masipa, DA-LP, sê sodra dié gebiede tot rampgebiede verklaar is, sal me. Thoko Didiza, minister van landbou, grondhervorming en landelike ontwikkeling, ’n begroting kan opstel en ’n rekwisisie by die nasionale tesourie kan indien vir finansiering om die sprinkane te bekamp en te voorkom dat die swerms verder versprei.
Hy sê die DA is bekommerd oor die vele probleme waarmee spuitspanne gekonfronteer word, onder meer die tekort aan beskermende kleredrag en gif. Die DA is ook bekommerd dat spuitspanne sal ophou spuit as die staat nie agterstallige eise betaal nie.
Landbou.com het verlede week by die departement navraag gedoen oor waarom sommige betalings aan die spuitspanne agterstallig is. Volgens die departement is alle eise waarvoor daar volledige dokumentasie ingedien is, betaal. Die departement versoek dat alle klagtes of navrae oor agterstallige betalings aan sy provinsiale kantore gerig word.
Die DA stel voor dat ’n forum vir belanghebbendes in die vier provinsies op die been gebring word, data oor die uitbrekings beskikbaar gestel word en sateliettegnologie ingespan word om teling- en migrasiepatrone te ontleed en voorspel.
OOS-KAAP NOU ’N BRANDPUNT
Me. Andrea Campher, risiko-en-rampbestuurder by Agri SA, sê die Oos-Kaap is tans ’n brandpunt. Hoewel dit rustiger in die Noord-Kaap gaan, word ’n vierde generasie van uitbrekings verwag.
Mnr. Eben du Plessis, ondervoorsitter van Agri Oos-Kaap, sê massiewe swerms kom van Aberdeen tot Willowmore en Steytlerville voor. “Die grootte van die swerms verbaas my. Dit is ook vreemd dat die swerms in ’n suidelike rigting beweeg.”
Hy sê ’n helikopter wat die departement verskaf, word ingespan om die swerms te bespuit, maar die gif sal binnekort op wees. “Daar is glo gif op pad, maar ons sal dit nie binne die volgende paar dae kry nie. As alles goed gaan, behoort ons dit teen die naweek te kry.”
Campher sê Agri SA wag vir terugvoering van die departement oor hoeveel gif beskikbaar is en waarheen die beskikbare gif gestuur sal word. Lugbespuiting is volgens Agri SA steeds nodig aangesien die omvang van die uitbrekings te groot is vir die spuitspanne om te hanteer.
Volgens Campher het Agri SA hierdie week ’n vergadering met die departement van landbou, grondhervorming en landelike ontwikkeling om kwessies in verband met die uitbrekings te bespreek.
Die Wes-Kaapse departement van landbou het verlede week gesê hy het R5 miljoen vir die bekamping van die uitbrekings bewillig. Campher sê hoewel dié skenking verwelkom word, is dit nog nie duidelik waarvoor dit aangewend sal word nie.
