Hulle het onderneem om van die begin van die jaar af te help met die inwerkingstelling van dié reëling. Dit volg ná vergaderings wat prof. Gareth Bath, sameroeper van die advieskomitee vir kleinveegesondheid, einde verlede jaar met verteenwoordigers van die makelaars oor die verspreiding van Johne se siekte gehou het.
Johne se siekte is ’n chroniese, ongeneeslike bakteriese siekte wat by skape voorkom. Skape met die siekte verloor gewig en vrek uiteindelik. Die siekte versprei stadig en dit is moeilik om dit in ’n vroeë stadium te identifiseer. Omdat die koop van skape die gevaarlikste bron van besmetting is, moet die risiko van besmetting voor enige aankope bepaal word. Dit is waar die verkoopsverklaring sal help, meen Bath. Daar sal veral klem gelê word op amptelike skaapveilings wat onder beskerming van die verskillende telersverenigings gehou word.
Bath het ander maatskappye, wat ook amptelike skaapveilings reël, versoek om die inisiatief te ondersteun.
Johne se siekte (Ovine Johne’s Disease of OJD) by skape is gevaarlik weens verskeie redes,
waaronder:
¦ Die koop van slegs een besmette dier wat gesond lyk, kan ’n kudde heeltyds skaad.
¦ Besmette plase word ingevolge huidige regulasies onder onbepaalde kwarantyn geplaas.
¦ Dit duur etlike jare voordat die boer besef dat daar ’n probleem op sy plaas is.
¦ Diagnose is nie eenvoudig nie en moet op ’n kuddebasis geskied. Dié toetse is redelik
duur en moet bevestig word.
¦ Sonder inenting kan jaarlikse verliese rampspoedig raak.
Bath sê boere wat meen dat hul kuddes nie besmet is nie, moet alles in hul vermoë doen om hul vee gesond te hou. “Ons aanbeveling is dat geen lewende skape sonder ’n goedgekeurde verklaring gekoop word nie. Die koper moet die verklaring deurlees en verstaan wat elkeen van die nege punte ten opsigte van die risiko beteken,” sê hy.
Volgens hom is dié verklaring geen waarborg vir die voorkoming van die siekte nie en die gebruik daarvan is ook nie 100% beskermend nie. “Maar die verklaring behoort dit minstens vir die voornemende koper moontlik te maak om die risiko verbonde aan die koop van bepaalde skape vas te stel. Dit moet verkieslik ook voor enige aankope deeglik met ’n veearts bespreek word.”
NAVRAE: Prof. Gareth Bath, sel 082 802 2526 of stuur e-pos gareth.bath@up.ac.za.
Dié berig is deur Cape Wools geskryf en verskaf. Rig navrae aan Louis de Beer by tel: 041 484 4301, E-pos: capewool@capewools.co.za, webwerf: www.capewools.co.za.
