Die kaas, wat vir tien maande verouder is, word deur Lactalis SA gemaak.
Mnr. Johan Ehlers, uitvoerende hoof van Agri-Expo wat die kampioenskap organiseer, het op ’n aanlyn uitsending van die prysuitdeling gesê die Suid-Afrikaanse suiwelkampioenskap is die enigste groot suiwelkampioenskap ter wêreld wat vanjaar én verlede jaar plaasgevind het.
“Die voorste internasionale suiwel- en kaaskampioenskappe is verlede jaar afgelas en vanjaar uitgestel.”
Bykans 900 produkte is vanjaar vir die Suid-Afrikaanse suiwelkampioenskap ingeskryf. Die beoordelaars was opgewonde oor die nuwe inskrywings en die vindingryke produkte wat ingeskryf is.
“Ons soek uitmuntende produkte en suiwelvervaardigers wat uitmuntendheid nastreef. Vir hulle is die suiwelkampioenskap ’n forum waar hulle hul uitstekende produkte kan ten toon stel, maar ook waar hulle hul produkte teen dié van ander vervaardigers kan meet,” het mnr. Alan Fourie, hoofbeoordelaar, gesê.
Qualité-toekennings is aan agt produkte toegeken. Dit is Woolworths 10 maande en Président ses maande verouderde goudakaas deur Lactalis SA (Ladismith), Clover (Frankfort) se Mooirivier- gesoute botter en botter in klein houertjies, De Pekelaar ou boerenkaas, Steers geprosesseerde roomkaassmeer (uie-en-grasuiegeur) gemaak deur Famous Brands Cheese, Woolworths chevin met knoffel en kruie deur die Fairview-kaasmaatskappy en ’n vanjieljegeur vla wat Fair Cape Dairies vir Checkers maak.
