’n Verslag ná ’n ondersoek oor beweringe van wanadministrasie, korrupsie en nepotisme by die landbousektor se Opvoeding-en- opleidingsowerheid (AgriSeta) sal moontlik hierdie maand gereed wees.
Mnr. Oupa Segalwe, woordvoerder vir die Openbare Beskermer, me. Busiswe Mkhwebane, het die ondersoek teen mnr. Jerry Madiba, uitvoerende hoof van AgriSeta bevestig. “Daar is inderwaarheid twee ondersoeke – een wat in 2013 begin is en nog een wat in 2016 begin is. Die eerste ondersoek se verslag is nou byna gereed en die ander oendersoek duur nog voort.” Hy sê nie in enige van die twee ondersoeke was daar beweringe teen mnr. Thami ka Plaatjie nie.
Agri SA, wat twee verteenwoordigers in die raad van AgriSeta het, het die gebeure daar as ontstellend beskryf en lede in ’n nuusbrief daaroor in kennis gestel. Die twee is mnre. Christo van der Rheede, adjunk uitvoerende direkteur wat onlangs as raadslid aangestel is en Neil Hamman, voorsitter van Agri SA se arbeidsbeleidskomitee.
Ondersoeke
Die eerste ondersoek hou verband met met sommige raadslede en Madiba wat beskuldig word van die indiening van vals eise, geld wat vir gala-geleenthede toegeken is sonder die raad se goedkeuring en pogings om onwettige transaksies te verdoesel.
Benewens die ondersoek na onregmatighede dui die AgriSeta se kwartaallikse moniteringsverslag daarop dat opleidingsowerheid ernstig onderpresteer het en net 66% van vereiste teikens behaal het. ’n Latere forensiese verslag dui ook op ongerymdhede met die toekenning van tenders, werwingsprosesse, ongeoorloofde betalings en wanvoorstellings aan die raad.
Die raad het Madiba versoek om op die verslae te reageer en ’n dissiplinêre proses is begin. Van der Rheede sê Suid-Afrika se 21 Seta’s ontvang meer as R21 miljard jaarliks van werkgewers en werknemers. Dit is veronderstel om aangewend te word om veral jong mense van vaardighede te voorsien sodat hulle in diens geneem kan word.
