Die Parlement se portefeuljekomitee oor arbeid het die verslag oor die nasionale minimumloon van die Nasionale Ekonomiese, Ontwikkelings- en Arbeidsraad (Nedlac) sonder enige wysigings aanvaar.
Dié verslag stel voor dat die nasionale minimumloon op R20/uur gestel moet word. Dié loon van R3 500 vir ’n 40 uur werksweek en ongeveer R3 900 vir diegene wat 45 ure per week werk, is vasgestel deur ’n paneel wat adj.-pres. Cyril Ramaphosa aangestel het om hom te adviseer oor wat dit moet wees.
Dit is die taak van die portefeuljekomitee om toe te sien dat die nodige wetgewing in plek gesit word om die nasionale loon te verwesenlik. Dit blyk egter nie ’n maklike taak te wees nie. Dit het die komitee byna vier ure geneem net om te besluit of hy die verslag net so moet aanvaar of eers wysigings moet aanbring.
Meningsverskille aangeteken
Die EFF en die DA-komiteelede het daarop aangedring dat hulle meningsverskille amptelik opgeneem word.
Mnr. Thembinkosi Rawula, EFF-lid belas met arbeid, het dit uitgespel dat sy party ’n minimumloon van R4 500 voorstel vir werkers wat 40 ure per week werk en nie die voorgestelde R20/uur loon goedkeur nie. Hy het ook voorgestel dat die loon jaarliks aangepas word en dat dit van die staanspoor af 100% toegepas word.
Die verslag stel voor dat die landbousektor vir die eerste twee jaar met ’n minimumloon van 90% of R3 150 belas moet word.
DA teen sambreel-loon
Die DA het aangedui dat hy geensins ’n sambreel minimumloon voorstaan nie. Mnr. Ian Ollis, die DA se skaduminister vir arbeid, het gesê dat die DA ’n minimumloon verkies, spesifiek vir die verskillende arbeidsektore. Die sektorale loon moet dan ook na die 15 sektore, wat nie tans onderhewig aan sektorale vasstellings is nie, uitgebrei word. Volgens Ollis is dit die beste manier om grootskaalse werksverliese te voorkom. Die instel van sektorale vasstellings vir dié sektore kan binne ’n jaar gedoen word.
Die party stel ook voor dat sektorale minimumlone deur ’n onafhanklike paneel van loonkenners vasgestel word, sonder enige insette of betrokkenheid van politici.
Pogings is aan die gang om die land se eerste minimumloon vanaf 1 Mei 2018 inwerking te stel.
