Goeie nuus vir veeboere buite die beheerde gebied is dat bek-en-klouseer in hierdie stadium tot 10 plase beperk is. Dit kom voor of dit die afgelope tyd nie verder versprei het nie.
Belanghebbendes in die rooivleis-, wol-, melk- en varkvleisbedryf het op 20 Oktober met me. Thoko Didiza, minister van landbou, grondhervorming en landelike ontwikkeling, vergader om omvattende maatreëls verder te bespreek.
Tot dusver kom die siekte voor op agt plase in Noordwes – meestal buurplase van die eerste plaas waar dit voorgekom het – en enkele plase waarheen diere ná ’n veiling op die indeksplaas vervoer is. Dan is daar ook ’n uitbreking op ’n plaas by Randfontein, Gauteng, en by Viljoenskroon in die Vrystaat wat met die veiling verbind word.
Tot dusver het China, Botswana en Mosambiek bilaterale ooreenkomste met Suid-Afrika oor invoer opgeskort. Mnr. Louw van Reenen, voorsitter van die rooivleisbedryfsforum en uitvoerende hoof van Beefmaster, sê ’n mens moet in gedagte hou die ooreenkomste verskil van land tot land.
“Die ooreenkoms met China het byvoorbeeld bepaal as dit in Limpopo en die noordelike dele van Mpumalanga en KwaZul-Natal voorkom, kan nog uitgevoer word, maar as dit buite die beheerde gebied versprei, word die uitvoer van wol, vleis en huide stopgesit.
“Dit hou groot nadele in. Dit is ons grootste vleisuitvoermark met die grootste volumes, al was dit nie altyd die mees winsgewende mark nie. Met tye word daar meer vleis daarheen uitgevoer as na die hele Midde-Ooste. Ons sal graag uitvoer wil herstel, maar dit gaan nie gebeur as ons nie die verspreiding buite die beheerde gebied ten volle keer en onder beheer het nie.”
Hy sê ander lande met wie uitvoerooreenkomste is, het ook vrae gevra en hulle moes gerus gestel word. Hy glo al wat hulle wil sien, is dat almal ernstig is om die probleem opgelos te kry.
Me. Thoko Didiza, minister van landbou, grondhervorming en landelike ontwikkeling, sê ’n dringende vergadering sal vandeesweek met die premier van Limpopo en relevante LUR’e gehou word om te verseker dat dringende en gepaste stappe gedoen word om die verspreiding van bek-en-klouseer uit Limpopo te bekamp.
Volgens Didiza het die departement se span in KwaZulu-Natal met belanghebbendes in die bedryf vergader om skadebepaling ná die onlangs vloede te doen en stappe te bespreek om die verspreiding van die siekte uit die rampbestuurgebied te voorkom.Didiza het op die vergadering gesê dat Suid-Afrika se bek-en-klouseervrye-status nagejaag sal word aangesien dit die uiteindelike doel is, maar dit kan geruime tyd duur om dié doelwit te behaal. Sy het gesê die regering en die bedryf moet dringend ’n noodplan saamstel.
