‘Brics kan ons nie help nie’

Die versterking van die Suider-Afrikaanse ontwikkelingsgemeenskap (SAOG) is belangriker vir Suid-Afrika as om aan Brics te behoort.

Dit was die strekking van wat dr. Roelof Botha, ekonoom van die Optimum-groep, en dr. Theo de Jager, boer, stigterslid van die netwerkorganisasie Saai en nie-uitvoerende lid van die nuwe Agri X-groep, op ’n paneelbespreking van laasgenoemde gesê het.

Suid-Afrika se bruto binnelandse produk (BBP) is volgens Botha slegs 2% van die totale BBP van die Brics-lande, maar die land moet 20%-bydrae tot Brics lewer.

“Waarom vat ons nie die geld wat ons in ’n gat (in Brics in) pomp en neem ’n fraksie daarvan om die SAOG-sekretariaat in Gaborone te versterk en maak 100% seker dat ons die logistiek begin versterk nie?” het Botha gevra. “In die SAOG is daar ’n groter bevolking as in Amerika en die inkomste per persoon groei twee maal so vinnig as in Amerika.”

Werkskepping

As die streek sy invoer van China met 10% kan sny, wat moontlik is deur kwotas in te stel, kan 20 miljoen werkgeleenthede volgens Botha in die SAOG geskep word.

De Jager het gesê hy hou van Botha se gedagte om geld wat na Brics gaan, eerder in die SAOG te sit. Na sy mening hoort Suid-Afrika glad nie in Brics nie. “Ons is nie in dieselfde liga as Indië en China nie.”

Suider-Afrika behoort wel in Brics te wees. “As ons oor grense met ons buurlande kan verenig, dink net watter magtige ekonomiese blok ons kan opstel.

“Uit ’n eenvoudige plaashoek, stel jou voor ons het ’n sentrum van uitnemendheid in byvoorbeeld Gaborone of Windhoek, waar die saad- en kunsmismaatskappye proewe kan doen. Ons sit al ons beste wetenskaplikes daar, pleks van om die proewe in 12 lande te doen. Elke land behoort steeds self te besluit of hy ’n produk toelaat. Die koste om nuwe produkte na Suid-Afrika te bring, kan verlaag word tot 8% van wat dit tans is. Ons kan dan dieselfde toegang tot nuwe tegnologieë hê as wat Australiërs, Argentyne en Brasiliane het.

“Ons sal dan mededingend wees, maar dit sal ’n besluit deur die SAOG verg. Brics kan ons nie help nie.”

Afrika-unie

Prof. William Gumede, medeprofessor aan Wits se skool van regeerkunde en deel van die paneelbespreking, was betrokke was by die opstel van ’n verslag vir die regering ter motivering van aansluiting by Brics in 2008. Hy het gesê Suid-Afrika se ekonomie is al vir die laaste 150 jaar verbind tot dié van die SAOG en dié breër siening van die Suid-Afrikaanse ekonomie was juis deel van die motivering. Die gedagte was verder dat die Afrika-unie later deel word van Brics, maar in praktyk het dié sienings nie werklikheid geword nie.