Luidens ’n verklaring sê die organiseerders dat die eerbewyse, wat ’n inisiatief van die Suid-Afrikaanse Rooivleisbedryfsforum is, vanjaar ’n verstommende 40 000 benoemings ontvang het. Verlede jaar is 30 000 benoemings ontvang.
Verbruikers word jaarliks gevra om hul gunsteling-slaghuise te benoem. Teen die einde van die jaar kan verbruikers aanlyn stem vir hul gunsteling-slaghuise vir gehalte, higiëne, diens en waarde aan klante. Die topbenoemde slaghuise kry dan ‘n verrassingsbesoek van lede van die Suid-Afrikaanse vleisbedryfsmaatskappy (Samic) wat die slaghuis op 212 punte oudit ten opsigte van gehalte, higiëne, diens en waarde.
Mnr. Dewald Olivier, uitvoerende hoof van die Suid-Afrikaanse Voerkraalvereniging, sê sedert dié eerbewyse in 2005 toegeken word, het slaghuise se standaarde aansienlik verbeter. Die terugvoer wat van verbruikers ontvang word, dui aan dat die meeste verbruikers die eerbewyse as ’n seël van goedkeuring beskou, veral omdat ’n slaghuis nie homself kan inskryf nie, maar deur verbruikers benoem moet word.
Wenners neem deel in drie kategorieë. Goue en platinum toekennings is in elke provinsie toegeken, waaruit nasionale wenners in elke kategorie aangewys is.
Die nasionale wenners in die kategorie vir slaghuise met vier of meer kasregisterpunte was Boma Vleismark (platinum), Moreleta Park in Pretoria, en Impala Vleis (goud), Brits.
In die kategorie vir slaghuise met drie of minder kasregisterpunte het West End Vleismark, Kimberley, die platinum prys ontvang en Frank’s Meat Supply Retail City, Middelburg, goud.
In die kategorie vir voedselmarkte of supermarkslaghuise het Malmesbury SuperSpar, Malmesbury, die platinum prys ontvang en Karaglen Superspar, Edenglen, goud.
Die wenners in die platinum kategorie het elk R20 000 ontvang en die goue wenners elk R10 000.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
