Die vertraging met die lewering van bloutongentstof is ’n tydbom wat ernstige gevolge vir die kleinveebedryf inhou as dit nie betyds gelewer gaan word nie, sê mnr. Kelvyn Breetzke, hoofbestuurder handel van BKB.
Breetzke het die aankondiging van Bayer Dieregesondheid, wat as verspreider van Onderstepoort Biologiese Produkte (OBP) optree, dat die lewering van die entstof teen bloutong eers teen einde November, as ’n groot teleurstelling bestempel. “Ons lê al maande op die verspreider se nek en is die versekering gegee dat dit teen die einde van Oktober beskikbaar sou wees. Nou het ons so pas gehoor dat dit uitgestel is.”
Breetzke het aan Landbouweekblad gesê dat 99% van die voorraad by ál sy handelstakke uitverkoop is. “Daar is net enkele botteltjies by sommige van ons takke van verlede jaar se voorraad, waarvan die vervaldatum op hande is. Ons sit elke jaar met dié probleem. Daar is geen ander gelisensieerde verskaffers na wie ons kan gaan nie.”
Mnr. Leon de Beer, hoofbestuurder van die NWKV, het die vertraging as ’n “absolute krisis” bestempel. “OBP het in die verlede ’n belangrike rol gespeel om entstowwe te berei om die nasionale gesondheid van die land se veestapel te verseker. Boere het géén ander keuse as om hulle diere te ent nie en as daar nie entstof beskikbaar is nie, kan die gevolge katastrofies wees.”
De Beer sê hoewel die B- en C-stamme van die entstof beskikbaar is, dit die A-stam is wat nou berei moet word. “Daar was voorstelle om aanvanklik eersgenoemde twee stamme teen twee-derdes van die prys beskikbaar te stel en dit later met die A-stam aan te vul. Die etikettering van die verpakking en verspreiding daarvan sou egter ’n logistiese nagmerrie gewees het.
“Die tyd loop uit en ons kan maar net hoop dat die entstof wel op die laaste teen die einde van die maand gelewer kan word. Baie hang van reënval af hoe fel die siekte volgende jaar sal wees,” het de Beer gesê.
Dr. Jacob Modumo, die sake-ontwikkelingsbeampte van OPB het op navraag van Landbouweekblad gesê dat hy tans in samesprekings gewikkel oor die beskikbaarstelling van die entstof en dat ’n mediaverklaring môre (Woensdag) uitgereik sal word. Hy wou hom nie uitlaat of die entstof wel teen die einde van die maand beskikbaar sal wees nie.
