Die verwydering van wantroue tussen die staat en private sektor is een van die oplossings wat Suid-Afrika se voedselonsekerheid op huishoudelike vlak kan help oplos.
Mnr. Jannie de Villiers, hoof uitvoerende beampte van Graan SA, sê ’n spreekwoordelike brug is nodig tussen nasionale voedselsekerheid in Suid-Afrika en die probleme met voedselsekerheid in huishoudings.
De Villiers was een van die sprekers op die 11de AMT-vooruitskouings konferensie in Pretoria.
Hy sê vennootskappe tussen dié twee sektore in die land sal toegang tot voedsel aanpak, maar die wantroue wat bestaan, veroorsaak verdeling. “Die staat vertrou nie die private sektor nie, en die private sektor vertrou nie die staat nie. Ons moet ophou om sleg te praat oor mekaar.” De Villiers sê dié situasie hinder vooruitgang in die land.
Moeilikheid
Hy sê voedselproduksie in die land is “in die moeilikheid” en dringende aandag moet gegee word aan die landboubedryf. Hy stel verbeterings aan infrastruktuur, soos paaie, voordelige landboubeleide, die uitbreiding van besproeiing en ’n kultuur van mentorskap en opleiding voor.
Boere word aangemoedig om nie fokus te verloor weens uitsprake oor nasionalisering en dies meer vanuit oorde wat nié beleide kan bepaal nie. “Ek dink ons bestee te veel aandag aan dié mense,” aldus De Villiers.
Verder daag hy belanghebbendes in die bedryf uit om “brawe besluite” te neem en leierskap te toon. “Ons het moedige leiers in die land nodig om ’n groter produksievermoë in die land skep.”
