Rabe sê hidrobreking sal ’n verwoestende impak hê op Suid-Afrika se vermoë om voedsel te produseer. Dié mening word ondersteun deur ’n groot hoeveelheid wetenskaplike navorsing wat daarop dui dat hidrobreking ernstige risiko’s vir die omgewing, veral waterbronne, inhou. “Dit word vererger deur die beperkte kennis oor die langtermyngevolge van hidrobreking,” sê Rabie.
Hidrobreking vereis die gebruik van ’n groot hoeveelheid water tydens eksplorasie, asook die produksie van petroleum. Die chemikalieë wat in hierdie proses gebruik word, besoedel alle water wat daarvoor gebruik word. “Dit skep ’n noemenswaardige risiko vir die besoedeling van diep asook vlak ondergrondse waterbronne, oppervlakwaterbronne en die omliggende omgewing.”
Rabie sê Suid-Afrika kan dít nie bekostig nie aangesien die land reeds onder hoë waterdruk verkeer met ’n watertekort van 17% wat vir 2030 voorspel word. Na beraming sal sowat R33 miljard jaarliks vir die volgende tien jaar belê moet word om dié tekort te voorkom.
Terwyl die plaaslike landbousektor tans vir Suid-Afrika en sy buurlande voldoende voedsel kan voorsien, is daar volgens Rabie aanduidings dat voedselproduksie drasties sal moet toeneem om op kort en mediumtermyn met bevolkingsgroei by te hou.
Staatsbestuur ‘uiters kommerwekkend’
“Suid-Afrika se staatsbestuur van die omgewing, wat die geïntegreerde bestuur van waterbronne insluit, is uiters kommerwekkend. Al drie vlakke van die regering het al bewys dat hulle nie hul grondwetlike pligte ten opsigte van die omgewingsbestuur van Suid-Afrika se water en ander natuurlike hulpbronne kan nakom nie.”
Hy sê die departement van water en sanitasie se onlangse verslag oor die nasionale toestand van water benadruk dat die regering se regulering en bestuur van rommelverwydering heeltemal onvoldoende is. Volgens die verslag is dit gedeeltelik weens die gedeelde uitvoerende en wetgewende bevoegdheid van provinsiale en plaaslike owerhede wat rommelverwydering betref.
“Die onvermybare werklikheid is dus dat Suid-Afrika nie hoë waterverbruik én die besoedelende gasbedryf aan die kus kan akkommodeer sonder om die landbousektor se vermoë op te offer om ’n groeiende bevolking plaaslik en in buurlande te voed nie.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
