Een van die grootste uitdagings wat ’n verslag van die internasionale organisasie vir dieregesondheid (OIE) oor die prestasie van SA se veterinêre dienste identifiseer, is die nasionalisering van beheerstrukture.
Die Departement van Landbou, Bosbou en Visserye het onlangs ’n langverwagte verslag van die internasionale organisasie vir dieregesondheid (OIE), die Beoordeling van Prestasie van Veterinêre Dienste (PVS), op sy webwerf beskikbaar gestel. Die verslag is reeds in April 2013 opgestel, maar die departement het dit nie beskikbaar gestel nie.
Die doel van ’n PVS-verslag is om lidlande te help om aan internasionale standaarde te voldoen deur die lande se veterinêre dienste onafhanklik te evalueer, probleemareas te identifiseer en oplossings voor te stel.
Volgens me. Annette Steyn, die Demokratiese Alliansie (DA) se skaduminister van landbou, bosbou en visserye, is die probleme wat deur die verslag aangespreek word, nie onoplosbaar nie.
Dr. Faffa Malan, bekende veearts en ook betrokke by www.landbou.com se paneel van kundiges, sê die nasionalisering van beheerstrukture is die grootste uitdaging wat deur die verslag bespreek word. “Besluite van nasionale belang moet deur die nasionale departement geneem word en nie deur provinsiale departemente nie,” sê hy.
Die Wet op Dieresiektes (Wet 35 van 1984) is verouderd en die Grondwet het sedert 1996 heelwat van dié wet se funksies vervang, sê Steyn. Volgens haar is die oplossing om die Grondwet te verander om veterinêre stelsels te nasionaliseer óf om die Dieresiektewet te verander.
Die verslag spreek ook die herwinning van bek-en-klouseervrye status aan. SA het egter sy status as bek-en-klouseervry (sonder inenting) op 14 Februarie vanjaar teruggekry.
Verder beveel die verslag aan dat die staat en privaat-veeartse beter moet begin saamwerk. Dr. Henk Basson, voorsitter van die SA Veterinêre Vereniging (SAVV), sê hulle het Donderdag, 5 Junie, met die Dieregesondheidsforum en die departement vergader en die verslag bespreek. Volgens Basson was dit ’n positiewe vergadering en het beide partye ingestem om ten volle saam te werk.
Lees jou volgende Landbouweekblad vir nog kommentaar oor die verslag.
