Die landbou is uitgelewer aan die weer en Suid-Afrika het die afgelope paar jaar eintlik goeie klimaatstoestande gehad, tot só ’n mate dat vier van die land se grootste mielie-oeste en hoogste opbrengste in die afgelope ses jaar gestroop is, sê dr. Werner Rossouw, direkteur en handelaar van Silostrat.
“Soos dinge tans lyk, kan vanjaar die vyfde van die afgelope sewe jaar wees wat ’n baie goeie oes oplewer. Daar is dele in die ooste wat ’n bietjie swaar trek weens ’n oormaat reën, maar veral in die sentrale en westelike streke lyk die oes werklik goed.”
Met die vooruitskouings van ’n warm Januarie met reënweer wat moontlik in Februarie volg, is ’n baie goeie someroes in 2022-’23 volgens Rossouw moontlik. “Dit lyk tog asof vanjaar die laaste jaar van ons sogenoemde nat siklus kan wees en dat die reënpatrone na ’n droër siklus neig. Tog moet beklemtoon word dit dui nie noodwendig op ’n droogte in 2023-’24 nie, maar net die begin van ’n droër siklus.
