Dit volg na ’n vraag uit die gehoor by die onlangse Rooivleisprodusente-organisaie (RPO)-streeksvergadering op Dundee, KwaZulu-Natal, van mnr. Bok Erasmus, ’n beesboeer van die omgewing wat meen die huidige stelsel is te ingewikkeld en ongespesifiseerd, verwarrend en tot ’n groot mate onregverdig. Erasmus wou weet hoe die RPO taakspan wat die doeltreffendheid van die huidige stelsel ondersoek, vorder.
Volgens Van der Ryst is dit ’n ingewikkelde proses wat baie faktore in ag moet neem. “Die taakspan, onder leiding van prof. Andre Jooste (voormalige senior bestuurder van mark- en ekonomiese navorsing by die Nasionale Landboubemarkingsraad), is reeds besig om ’n wetenskaplike evaluering te doen. Deel van hierdie evaluering is om te hoor wat sê die verbruiker, want die verbruiker is koning. So die ondersoek is nog aan die gang.
“Maar al die rolspelers binne die Rooivleis Forum – die boere, die slagplase, die voerkraalmanne en die kleinhandelaars – is almal waarnemers van die proses. Die boere wil een stelsel hê en al die ander rolspelers wil ’n stelsel het van húlle pas, so daar is heelwat belangebotsing. Ek verwag nie dat ons binne die volgende drie jaar hierdie navorsing afgehandel sal hê nie,” het Van der Ryst laat hoor.
Mnr. Erasmus wou ook weet watter pogings word intussen aangewend om huishouers beter in te lig oor die huidige vleis-klassifikasie-stelsel. “Ons is besig om die huisvrou ’n klomp inligting te gee deur die skaapvleis-forum. Maar dit is ’n moeilike situasie en ons kan lank hieroor debatteer. Ons boere sê mos vir mekaar die klassifikasie-stelsel geld net vir ons, want as daai klomp karkasse gesaag, gesny en verpak is, dan is dit weg (en die klassifikasie het geen verdere doel nie). Maar die mark dikteer hoe die produk moet lyk.
“Al wat gedoen is met die klassifikasiestelsel, was om die standaard te stel van wat die mark wil hê. Maar om die huisvrou in te lig (oor die klassifikasie van vleis), is amper ’n onbegonne taak, want die boere verstaan nog nie eens die klassifikasiestelsel nie.”
