’n Vlieg wat parasiete in heuningbye se agterlyf inspuit, is glo verantwoordelik vir die daling in bygetalle, sê ’n wetenskaplike.
Luidens ’n berig op Health24.com is ’n artikel oor dié verskynsel onlangs in die Public Library of Science (PloS One) gepubliseer.
Die phorid-vlieg (Apocephalus borealis) besmet die by met larwes van die parasiet. Dit veroorsaak verwarring by die by. ’n By wat met die parasiete besmet is, verlaat dikwels in die nag die korf op soek na lig.
Dit sal sowat sewe dae nadat dit besmet is, vrek en parasiete sal daaruit voortkom. Hoewel ’n by gewoonlik opkrul wanneer hy vrek, bly die by sy pote beweeg as hy met larwes besmet is. Wetenskaplikes verwys derhalwe na “zombie”-bye.
Oplossing?
Prof. John Hafernik, een van die deelnemers aan die studie en ’n dosent in biologie aan die Universiteit van San Francisco, sê wetenskaplikes kon nog nie ’n oplossing vir die probleem kry nie, want hulle weet nie waar die besmetting deur die vlieg plaasvind nie.
Groot kommer bestaan tans oor die wêreldwye daling in heuningbye se getalle. Die meeste die “zombie”-bye is tot dusver in die suide van die Amerikaanse staat Dakota aangeteken.
Die bedreiging van heuningbye kan ’n groot krisis vir die wêreld en voedselproduksie beteken.
Bron: Health24.com
12 Januarie 2012
