Dele van die noorde van Namibië is as rampgebiede verklaar nadat vloedwater sowat 10 000 mense dakloos gelaat en paaie weggespoel het. Luidens ‘n berig op News24.com het 62 mense al in Oshakati, 720 km noord van Windhoek, reeds verdrink en is 5000 inwoners van dié gebied reeds uit hulle huise gedryf.
“Ek en my kabinet het die heersende situasie in diepte bespreek, en met verskeie kenners daaroor gepraat… en ek het tot die gevolgtrekking gekom dat ek ‘n rampsituasie in die noorde en noord-oostelike dele van ons land moet verklaar”, aldus mnr. Hifikepunye Pohamba, Namibië se president.
Ergste in geskiedenis
“Namibië ondervind weer verwoestende vloede… hierdie kan die ergste vloedramp in die land se geskiedenis wees”, sê Pohamba.
Hy sê 247 skole moes hulle deure sluit weens stygende watervlakke, en klinieke en huise is oorstroom. Hoë reënval het sedert Januarie in die noorde van die land voorgekom, wat die watervlakke in die Zambezi- en die Okavangorivier baie verhoog het.
Hulp vir mielie-oeste
Pohamba sê hulle is bekommerd dat die oorstromings die land se mielie-oes kan beïnvloed. Dié gewas is die land se stapelvoedsel, en derhalwe is ‘n bedrag van N$30 miljoen bewillig om dié krisis aan te spreek.
Reën word ook in die suide van Angola verwag, wat die kanse vir oorstromings in dié land verhoog.
Bron: News24.com
30 Maart 2011
